भांगरभूंय | प्रतिनिधी
सलाम फौजी
लेफ्टनंट कमांडर लियो डायस (निवृत्त) 10 जुलय 1977 दिसा सांताक्रूझ गांवांत पास्कोल डायस आनी कॅन्डीडा डायस- सापेको ह्या अभिमानी आवय- बापायच्या घरा जल्मल्लो. ताणें गांवच्या सांताक्रूझ हायस्कुलांत आनी उपरांत पणजेच्या सरकारी पॉलिटेक्निकांत सिव्हिल इंजिनियरिंगांत डिप्लोमा आनी निमाणें गोंय इंजिनियरिंग कॉलेज, फार्मागुडीच्यान सिव्हिल इंजिनियरिंगांत पदवी मेळयली. उपरांत भारतीय नौसेनेत कार्यकारी शाखेंत अल्प सेवा कमिशन अधिकारी म्हणून ताची निवड जाली. 2002 वर्सा नौदलांत ताची कारकीर्द सुरू जाली. सुरवेक ताचें मुळावें कॅडेट प्रशिक्षण बेती- वेरेंच्या (नॅव्हल अॅकॅडमी) आयएनएस मांडवींत जालें. मागीर कोच्ची- केरळांत ऑन बोर्ड वॉरशिप प्रशिक्षण घेतलें.
मुंबय, विशाखापट्टणम, कोच्ची हांगा वेवसायीक प्रशिक्षण आनी आयएनएस कोरा 2005 चेर वॉच कीपिंग प्रशिक्षण घेतलें. ताची पयली पोस्टिंग नेव्हिगेशन ऑफिसर म्हणून 2004 वर्सा पोर्ट ब्लेअरांतल्या वॉरशिप आयएनएस चित्ताचेर जाली. उपरांत 2007 वर्सा गोंयांत आयएनएस टी55 चेर कार्यकारी अधिकारी म्हणून ताणें काम केलें. लेफ्टनंट कमांडर लियोन मुंबयच्या नेव्हल प्रोव्होस्ट आनी रेग्युलेशन स्कूलांतल्यान नेव्हल प्रोव्होस्ट मळार आपलें खाशेलपण थारायलें आनी उपरांत गुजरातांतल्या आयएनएस वालसूरात नेव्हल प्रोव्होस्ट मार्शल, गुजरात वाठारांत ताची नेमणूक जाली.
वेवसायीक क्षमता आनी येसस्वीपणाक लागून उपरांत लेफ्टनंट कमांडर लियोची नेमणूक नेव्हल प्रोव्होस्ट आनी रेग्युलेटिंग शाळेंत मुखेल प्रशिक्षक म्हणून, सगळ्या प्रोव्होस्ट अधिकारी आनी प्रोव्होस्ट खलाश्यांक प्रशिक्षण दिवपा खातीर जाली.
12 वर्सां गौरवशाली सेवा पुराय जातकच 2014 वर्सा लेफ्टनंट कमांडर म्हणून अल्प सेवा आयोगांतल्यान सुटका जाली.
सध्या तो रिझर्व्ह बँक ऑफ इंडियाच्या सुरक्षा पंगडाचो भाग आसा. सध्या रिझर्व्ह बँक ऑफ इंडिया, मुख्यालय मुंबय हांगा सुरक्षा वेवस्थापक म्हणून नोकरी करता.
जिणेंत ताणें केल्लीं थोडींच कामां अशीं (अ) सरकारी पॉलिटेक्निक पणजींत डिप्लोमा (1996), (ब) गोवा विद्यापीठांतल्या गोंय अभियांत्रिकी कोलाजांत बीई (सिव्हिल) हांगा भांगरा पदक (2000), (क) भारतीय नौदलाच्या सी- इन- सी तोखणाये खातीर 2013., (ड) सेवे खातीर भारतीय रिझर्व्ह बँकेंत रुप्या पदक, (इ) त्रिसेवा फायर सेवेंतलें पयलें पद दिल्लीच्या सीएफआयएसांत प्रतिबंध आनी उजो पालोवपाचो अभ्यासक्रम.
लेफ्टनंट कमांडर लियो फुटबॉल, व्हॉलीबॉल, गिटार वाजोवप, गायन, अभिनय (बऱ्याच कोंकणी नाटक, तियात्रांनी अभिनय केला.), डीजे, मास्टर ऑफ सेरेमनी आदी मळांचेर सक्रीयपणान वावुरता.
जॉन आगियार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
