लेडी विथ द लेंप फ्लाॅरेन्स नायटिंगेल

भांगरभूंय | प्रतिनिधी

कोरोना महामारीच्या काळांत जे कितें घडले हें आमी सगळ्यानींच अणभवला. दोतोरानीं, नर्सींनी आपल्या जिवाची आहुती दिली. निसुवार्थी सेवेक तांणी आपलें पुराय जिवीत ओंपले. वैजकी मळाचेर वावुरपी जण एकलो कोरोनाच्या काळांतले खरे शुरवीर झुजारी. तांच्या सारकीच वावुरपी एक धीट बायल आशिल्ली, जिणें निश्ठेन आपली जीण लोकांचे सेवेक ओंपली आनी ती मसीहा म्हळ्यार फ्लॉरेन्स नायटिंगेल.
फ्लॉरेन्स नायटिंगेल एक नर्स, लेखिका आनी संख्याशास्त्रज्ञ. तिचो जल्म 12 मे 1820 सालांत फ्लॉरेन्स, इटली देशांत एका उच्च वर्गीय ब्रिटिश घराण्यांत जालो. पयशेकार, उच्च घराण्यांत जल्मांक येवन लेगीत तिका दिसपाक लागलें की तिचो जल्म सामान्य लोकांची सेवा करपाक जाला. तिणें आपली मोख गाठीत लोकांची सेवा करपाक सुरवात केली. 1853 सालांत जाल्ल्या क्राइमिनियन झुजा मजगतीं, तिणे जखमी सैनिकांची सेवा केली. तिका भरपूर प्रसिद्धी मेळ्ळी. तिच्या हातांतली कुशळटाय आनी विज्ञानिक दृष्टीकोनातल्यान दुयेंतीची सेवा केल्ल्यान परिचर्याशास्त्राक एक नवीन दिशा मेळ्ळी. तिच्या ह्या योगदानान ‘लेडी विथ द लँप’ ही उपाधी दित तिका सम्मानीत केली.
मुखार घायाळ, दुयेंत लोकांची सेवा करपाचें तिणें व्रत घेतलें. फ्लॉरेन्स नायटिंगेल ही नर्स पेशाची संस्थापक. तिणें 1860 त लंडनाक ‘स्कूल ऑफ नर्सिंग’ चें उक्तावण केलें, तशेंच वैजिण सेवा शिकपाक एक प्रशिक्षण स्कूल स्थापन केलें. मुखार नर्सींग वा हेरांक उपेगी पडपी अशे ‘नोट्स ऑन नर्सिंग’ हें पुस्तक बरयले. तिचें योगदान वैजकी मळा पुरते मर्यादीत उरलें ना. आपल्या संख्याशास्त्र ज्ञानाचो उपेग तिणें लोकांक जाल्ल्या दुयेंसांचो आंकडो, तो कसो उणो करप हाचो अभ्यास करुन जाणकारांक ताची म्हायती दिवपाचें काम केलें. फ्लॉरेन्स नायटिंगेलाचे योगदान पळोवन 1907 वर्सा राजा एडवर्ड सातवो हांचे हस्तुकीं तिका ‘ऑर्डर ऑफ मेरीट’ किताब प्रदान केलो. हो मान मेळोवपी ती पयली अस्तुरी. फ्लॉरेन्स नायटिंगेल हिणें 1910 सालांत लंडनाक निमणो स्वास घेतलो. तिच्या ह्या वावराक पळोवन तिच्या जल्मदीसा निमतान आंतराष्ट्रीय नर्स दीस मनोवपाचें घोशित केलें. ताकाच लागून दरवर्सा तिच्या जल्मदिसा निमतान संवसारभर आंतरराष्ट्रीय नर्स दीस मनयतात.

अतिशा सुर्लीकार
7262849923