भांगरभूंय | प्रतिनिधी
नवी दिल्ली, खबरां संस्था: केंद्र सरकारान आतां कार्यालयांत उसरां येवपी ‘लेट लतीफ’ कर्मचार्यांचेर कारवाय करपाक सुरवात केल्या. सदांच उसरां येवपी सरकारी अधिकार्यांचेर लक्ष दवरप सुरू केलां. केंद्र सरकारान तांकां खर शिटकावणी दिल्या. उसरां येवन बेगीन काम सोंपोवपाचो यत्न करप ही जायत्या सरकारी अधिकार्यांची संवय जावन पडल्या. जायते कर्मचारी बायोमेट्रीक हाजिरी करिनाशिल्ल्याचें कळटकच सरकारान हें पावल उबारलां.
मनीसबळ मंत्रालयान मोबायल फोनाचे आदारित आशिल्ल्या फेस ऑथेंटिकेशन सिस्टीमची तोखणाय करून अश्यो हेर सुविधायो आनी लायव्ह लोकेशन डिटेक्शन आनी जियो टॅगिंग सारक्या आधुनीक यंत्रणांचो वापर करप योग्य आशिल्ल्याचेंय म्हणलां. कर्मचारी आधार सक्षम बायोमेट्रिक हजेरी प्रणालीचो (एईबीएएस) अहवाल काडून असल्या लेट येवपी कर्मचार्यांचो अहवाल डावनलोड करचो आनी चुको करप्यांचो सोद घेवचो अशेंय सरकारान म्हणलां.
सध्याच्या नेमां प्रमाण एक दिसा उसरां आयल्यार अर्ध्या दिसाची प्रासंगीक (CL) सुटी लायतले, म्हयन्यांतल्यान दोन खेपो उशीर जाल्यार एका दिसाची प्रासंगीक रजा कापतले. लेट येवपा फाटलें कारण सामकें गरजेचें आसल्यार सक्षम अधिकारी माफ करपाक शकतात अशेंय तांणी म्हणलां. प्रासंगीक सुटी लावचे बगर अशा लेट येवपी कर्मचार्यांचेर विभागीय शिस्तभंगाची कारवायूय जावपाक शकता. कारण उसरां येवप हें वायट वेव्हार अशें समजता, अशें सरकारान म्हणलां.
कार्यालयांतल्यान बेगीन भायर सरप्यांकूय सोडूं नाकात!
ऑफिसांतल्यान बेगून घरा वचप हेंय ऑफिसांत लेट येवपा वरींच मानचें. खंयच्याय कर्मचार्यांनी वेळ पाळप, तांचे हजेरी संबंदीत डेटाक, संबंदीत कर्मचार्याला दिवपाचो म्हत्वाचो असाईन्मेंट, प्रतिनियुक्ती आनी बदली वा पोस्टींगचो विचार करतना लक्षांत दवरचें. बायोमेट्रीक योग्य तरेन कार्यरत आसच्यो अशेंय सगळ्या सरकारी विभागांक आदेश काडून केंद्रान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
