भांगरभूंय | प्रतिनिधी
पणजीः विधानसभा सत्राचो तिसरो दीस लेगीत कोफुसांवांत सुरू जालो. विशय न्यायालयांत प्रलंबीत आसा अशें सांगून नगर नियोजन खात्यांक विचारिल्ल्या प्रस्नांची लेखी जाप दिवंकना, अशें रेव्ह्युलेशनरी गोवन्स पक्षाचे आमदार विरेश बोरकार हांणी सांगून विधानसभेंत बोवाळ केलो. ही जाप दिवपाचें आस्वासन मेळ्ळे उपरांत काम सुरळीत सुरू जालें.
विधानसभा सत्र सुरु जावचे पयलींच आमदार विरेश बोरकार हांणी आक्षेप घेतलो. हांवें नगर नियोजन खात्याक कलम ३९ (अ), टीसीपी बोर्ड आनी हेर विशयांचेर प्रस्न घाल्ले. मात, ह्या प्रस्नांची जाप पळोवपाक गेल्यार जापो रित्यो आसात आनी थंय प्रस्नचिन्न बरयल्यांत. हाचें स्पश्टीकरण दितना नगर नियोजन खात्यान लेखी जाप दिल्या, हो विशय न्यायालयांत प्रलंबीत आशिल्ल्यान जापो दिवंक मेळना.
हे विशीं जाप दितना मुख्यमंत्री डॉ. प्रमोद सावंत हांणी सांगलें, नगर नियोजन खात्याचे प्रस्न फाल्यां येवपाचे आसात. ताचेर आयजूच कित्याक बोवाळ करतात? हाका जाप दितना विरेश हांणी सांगलें, फाल्यांच्या प्रस्नाची तयारी करपाक आपल्याक आयजूच जाप जाय. सगळे विशय न्यायालयांत आडकून आसात. नगर नियोजन खातेंच न्यायालयांत आडकून उरिल्ल्यांत जमा जालां, असो आरोप बोरकार हांणी केलो.
उपरांत विरेश बोरकार हांकां तेंको दिवपा खातीर हेर विरोधी आमदार उठले. बोवाळ जाले उपरांत ह्यो जापो मुखेल सचिवांक आयजूच दिवपाक लावचे अशे निर्देश दिवचे, अशी सुचोवणी मुख्यमंत्र्यान सभापती रमेश तवडकार हांकां दिली. सभापतीन जापो दिवपाचें मान्य केले उपरांत बोवाळ बंद जालो आनी विधानसभेचें फुडलें कामकाज सुरळीत चालीक लागलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
