भांगरभूंय | प्रतिनिधी
प्रधानमंत्री नरेंद्र मोदी हांणी भेटयली परबीं
नवी दिल्ली, खबरां संस्था ः लेखिका सुधा मूर्ती हांची राश्ट्रपती द्रौपदी मुर्मू हांणी राज्यसभेंत नेमणूक केली. अधिकृत म्हायती आयले उपरांत प्रधानमंत्री नरेंद्र मोदी हांणी तांकां परबीं भेटयली. सुधा मूर्ती हांणी राज्यसभेंत नेमणूक जाले उपरांत आपली खोशी उक्तायल्या. सध्या आपूण भारतांत ना अशें तांणी सांगलां. पूण ही बायलां दिसा मेळिल्ली एक खास भेट आसा. देशा खातीर काम करप ही एक नवी जापसालदारकी. अशें सांगून तांणी प्रधानमंत्री नरेंद्र मोदी हांचे उपकार मानले.
भारताच्या राष्ट्रपतीन सुधा मूर्तीक राज्यसभे खातीर नामांकित केल्या म्हूण म्हाका खोस जाता. समाजीक वावर, परोपकार, शिक्षण ह्या सारक्या जायत्या मळार सुधाजीचें योगदान अतुलनीय आनी प्रेरणादायक आसा. राज्यसभेंत तिची हजेरी आमचे ‘बायल शक्तेचो’ खर पुरावो. आमच्या देशाचो फुडार घडोवपाक बायलांचें बळगें आनी तांक हें एक व्हड उदाहरण. हांव तांका संसदीय कार्यकाळ खातीर परबीं भेटयता अशें प्रधानमंत्री मोदी हांणी ट्विट केलें.
सुधा मूर्तीचें व्यक्तिमत्व बहुआयामी आसा. सुधा मूर्ती ही इन्फोसिस फावंडेशनाची अध्यक्ष आसा. सुधा मूर्ती सतत बायलां आनी भुरग्यां खातीर वावुरता. कन्नड आनी इंग्लीश साहित्यांतल्या योगदाना खातीर सुधा मूर्तीची नामना आसा. ताणें जायतीं प्रेरणादायक पुस्तकां बरयल्यात. ती संवसारीक नामनेची लेखिका, शिक्षक, उद्देजक आनी समाजसेवक आसा.
सुधा मूर्ती हांका 2006 वर्सा समाजीक वावराक लागून भारताचो चवथो सगळ्यांत व्हडलो नागरी पुरस्कार पद्मश्री फावो जाल्लो. 2023 वर्सा तांका भारताचो तिसरो सगळ्यांत व्हडलो नागरी पुरस्कार पद्मभूषण फावो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
