भांगरभूंय | प्रतिनिधी
पोरूं ८ नोव्हेंबराक स. मीनाबाय काकोडकार हांच्या कथा संग्रहाचो लोकार्पण सुवाळो जालो. तेन्ना तांच्या कथांचेर दामोदर मावजो उलयिल्ले. तेन्ना तांणी मीनाबायच्या एके भूतकथेचो उल्लेख केल्लो आनी आपणेंय अशे तरेची भूयकथा बरयल्ली अशें सांगलें. ते कथेचो इंग्लिश अणकार जालो आनी ‘Damodr Mauzo’s Ghost Story’ अशें कितें तरी वाचतकच तांकां आपणें भूतकथा बरयल्ली हें होलमलें. जी संकल्पना आपूण मानीना ताचेर बरोवप आनी वाचप्याक ताचेर विस्वास दवरपाक लावप हें आपणाक पटलें ना अशें तांणी मत मांडलें. तशेंच एक भूतकथा गुलजारजीन बरयल्या आनी तांचेय कडेन आपणें वाद घालो, जें लेखकाक पटना तें लेखकान बरोवप ना, असो सुंदर विचार भाई मावज्यान मांडलो.
ह्या विचारा खातीर म्हज्या मनांत कांय विचार आयले. लेखका विशीं लेखकान पाळपाच्या नैतिकते विशीं. लेखकाचेर तशीं कांय बंधना आसना. पूण नैतीक जापसालदारकी मात आसता. मन खूब फाटीं गेलें. अशा दोन सुप्रसिद्ध लेखकांची याद आयली जे म्हजे नदरेंतल्यान कायमचे देंवले. कुशवंत सिंह आनी शोभा डे.
तेन्ना हांव लेखक नाशिल्लें, पूण एक वाचक म्हूण कांय गजाली मनाक पटल्यो नात. कुशवंत सिंह हांचें आत्मचरित्र वाचपाक घेतिल्लें. पूण लेखकान गरज नासतना कांय जाणां विशीं आपल्याक खबर आशिल्ल्यो वैयक्तीक गजाली बरयल्यात. अशे तरेन नांव घेनास्तना बरयल्यात की वाचप्यांक कोण ती कळटा. कांय गजाली पोजड्यो आनी वैयक्तीक बरयल्यात. त्या वयार म्हाका तें आवडलें ना. पुस्तक अर्द्यारूच सोडलें.
दुसरो अणभव शोभा डे हिच्या आत्मचरित्राचो. स्वताच्या आत्मचरित्राक ‘सिलेक्टीव मॅमरी’ म्हणप आनी बॉलीवूडच्या प्रसिद्ध व्यक्तीमत्वां विशीं खबर आशिल्ली वैयक्तीक गजाल बरोवप. कांय कडेन नांव घालूंक ना, पूण कोण तो/ ती कळटलें हाची खबरदारी घेतल्या. आपलीं आत्मचरित्रां चटपटीत जावचीं म्हूण इतल्या उणाक पांवड्यार देंवप हें ह्या लेखकाच्या मनाक पटलें?
लेखकाक समाजांत मान आसता. ताची एक नैतीक जापसालदारकी आसाता. पूण कांय लेखक दुसऱ्याच्या दुख्खा विशीं असंवेदनशील आसतात. जिवीताच्या प्रवासांत लेखकाक जायते लोक मेळटात. कांय जाण आपलें दुख्ख, वेदना, तांचे मुखार मांडटात वा कांय गजाली तांकां भायल्यांतल्यान कळटात. दुसऱ्याचें दुख्ख वा खाजगी गजाल आपल्या फायद्या खातीर वापरप योग्य न्हय. आपल्यो वेदना वा दुख्ख वा वैयक्तीक गजाली सांगपाचो अधिकार फकत त्याच मनशाक आसता.
लेखक फकत सुप्रसिद्ध वा प्रतिभावंत आसलो म्हूण जायना. जें सांगपाक जायना तें सांगप अयोग्य, तशेंच जें लेखकान सांगपाक जाय तें जर तो सांगिना जाल्यार तेंच अयोग्य थारता.
विल्यम शेक्सपीयर एक नामनेचे लेखक. तांचें नांव आयकूंक ना असो सुशिक्षीत मनीस मेळप कठीण. पूण ताका नैतीकताय ना आनी समाजीक प्रस्नांत रुची नाशिल्ली अशी टिका लिओ टॉलस्टॉय हांणी केल्ली. लिओ टॉलस्टॉय एक प्रतीभावंत आनी श्रेश्ट लेखक आशिल्लेच, पूण तांची
नैतीक भुमिका तितलीच श्रेश्ट
आशिल्ली. तांच्या साहित्यान गांधीजी प्रभावीत जाल्ले. लेखकाच्या प्रतिभेक जितलें म्हत्व आसा, तितलेंच म्हत्व ताचे नैतिकतेक आसा.
संपदा कुंकळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
