भांगरभूंय | प्रतिनिधी
राज्यपाल: कृष्णदासा शामा गोंय राज्य मध्यवर्ती वाचनालया वतीन पुस्तक दीस उमेदीन
पणजी: समाजांतल्या सामान्य लोकांचे साबार विशयांचेर प्रबोधन करून तांकां सुशिक्षीत करपा खातीर लेखकांनी आपलें लिखाण सतत चालू दवरपाचो उलो, राज्यपाल पी. एस. श्रीधरन पिल्लय हांणी मारलो. पाटो पणजी हांगाच्या संस्कृती भवनांत कला आनी संस्कृती संचालनालयाच्या कृष्णदासा शामा गोंय राज्य मध्यवर्ती वाचनालयान आयोजीत संवसारीक पुस्तक दीस सुवाळ्यांत ते उलयताले.
ह्या सुवाळ्याक कला आनी संस्कृती संचालनालयाचे संचालक सगूण वेळीप, कृष्णदासा शामा गोंय राज्य मध्यवर्ती ग्रंथालयाचे क्युरेटर डॉ. सुशांत तांडेल, क्युरेटर, कृष्णदास शमा गोवा राज्य मध्यवर्ती ग्रंथालय, सहाय्यक राज्य ग्रंथपाल सुलक्षा कोरमुळे, कार्यावळ प्रभारी सिंधू दामले आनी हेर मानेस्त हाजीर आशिल्ले.
लिखाण करपाच्या कुशळटायेचेर भर दितना राज्यपालान पुस्तकां सदांच दुसर्यांच्या अणभवांतल्यान शिकपाक मदत करतात, अशें सांगलें. लिखाणांतल्यान आपल्या देशाची संस्कृती आनी एकात्मता संवसाराक दाखोवपाची गरज आसा. आपल्या देशाचो पर्जळीत फुडार घडोवपा खातीर लेखकांक चडांत चड संद दिवपाक जाय, अशेंय राज्यपालान म्हणलें.
महात्मा गांधीजींच्या पुस्तकांचो उल्लेख करून राज्यपालान म्हणलें, गांधीजी हे एक उत्कृश्ट लेखक आशिल्ले आनी तांचे इंग्लीश भाशेचेर प्रभुत्व आशिल्लें, पूण तांणी गुजराती भाशेंत चड पुस्तकां बरयलीं. ते आपल्या साहित्यांत सदांच सोपी भाशा वापरताले, अशें तांणी सांगलें.
सुरवातेक कला आनी संस्कृती संचालनालयाचे संचालक सगूण वेळीप हांणी मानेस्तांक येवकार दिलो. ह्या वेळार विवीध पुस्तकांचें प्रदर्शन मांडिल्लें. सिंधू दामले हांणी निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
