भांगरभूंय | प्रतिनिधी
माधव बोरकारः कोंकणी भाशा मंडळान घडोवन हाडली भास- संवाद कार्यावळ
भांगरभूंय । खबरां मेज
पणजीः दरेक कविता वा साहित्यकृती आपलें नशीब घेवन येता. कवितेची भास कवितेच्या प्रवासा बरोबर वाडत वता. लोकांक समजूंक जाय म्हूण लेखकान आपली अभिव्यक्ती पातळ करची न्हय. ती आयज समजली ना जाल्यार फाल्यां वाचकाक समजतली अशें मत ज्येश्ठ साहित्यकार माधव बोरकार हांणी व्यक्त केलें.
कोंकणी भाशा मंडळान संवसारीक मायभास दिसा निमतान ‘भास-संवाद’ हे कार्यावळीचें आयोजन केल्लें. हें कार्यावळींत बोरकार उलयताले. अंदूं हे कार्यावळींत मंडळान नामनेचे साहित्यकार माधव बोरकार आनी मेल्वीन रॉड्रिगीश हांचे कडेन भास- संवाद घडोवन हाडलो. फादर आग्नेल महाविद्यालयाच्या जोडपालवान ही कार्यावळ जाली. मुलाखत युवा लेखिका ममता वेर्लेकार आनी युवा लेखक आकाश गांवकार हांणी घेतली.
दरेके कवितेंत लेखकाचो अणभव गोठेल्लो आसता, तो काळाप्रमाण भायर येता. कविता फॅशन म्हूण बरोवची न्हय. तातूंत सामाजीक विशय येवचे, मात ती कविता कलात्मक पातळेर कितली वता हेंय महत्वाचें. ती काळाभायली जावंक फावना अशें मत बोरकार हांणी मुखार उलयतना उक्तायलें.
भारता भायर गल्फ सारकिल्ल्या प्रदेशांत वचून लेगीत आपणे कोंकणीक सोडूंक ना. थंयूय आपूण कोंकणीची सेवा करीत रावलों आनी मागीर बरो पगार आसून लेगीत परत भारतांत आयलो कारण आपल्याक कोंकणी खातीर वावुरचें आशिल्लें. कविता ट्रस्टाची स्थापना गल्फांतच जाली आनी आयज कविते खातीर हो ट्रस्ट भारतांत वावुरता अशें ज्येश्ठ साहित्यकार मेल्विन रॉड्रिगीस हांणी सांगलें.
साहित्या सांगाता आनी आमच्या पर्यावरणाचीय राखण करप गरजेचें. ह्यो गजाली
एकामेकांचेर अवलंबून आसात. आमचें पर्यावरण आनी सैम ना जालो जाल्यार मागीर साहित्यय उरचें ना अशें मत रॉड्रिगीस हांणी व्यक्त केलें.
कोंकणी साहित्याची समिक्षा जावंकूच जाय, मात ती समिक्षा पचोवपाची तांक आमच्या लेखकां मदीं आसा कांय कितें असो प्रस्न ह्या दोनूय जेश्ठ साहित्यकारांनी मांडलो.
हे कार्यावळीक गोंयांतल्या साबार महाविद्यालयांतले तशेंच गोंय विद्यापिठाचे विद्यार्थी उपस्थीत आशिल्ले. ह्या वेळार महाविद्यालयाच्या कोंकणी विभागाच्यो मुखेली राजश्री सैल हजर आशिल्ल्यो.
फादर आग्नेल महाविद्यालयाचे प्राचार्य फा. डॉ. फ्रेड्रीक रॉड्रिगीश हांणी येवकार दिलो जाल्यार कोंकणी भाशा मंडळाची अध्यक्ष अन्वेषा सिंगबाळ हांणी प्रास्तावीक उलोवप केलें. मंडळाची जोड सचीव डॉ. वेदिका वाळके हांणी उपकाराचें उलोवप केलें. सुत्रसंचालन गौरांग भांडिये हांणी केलें.
अस्वस्थ गजाल कवितेच्या रुपान भायर सरताः मॅल्वीन
फेसबुकाचेर लायक मेळ्ळे म्हूण कविता श्रेश्ठ जायना. ते लायक फकत दुसर्याक बरें दिसचे म्हूण आसतात. कविता ताचे पलतडीन वचून बरोवंक जाय. आपूण कविता बरयतना ती कोणाक आवडटली वा कोण तोखेतलो म्हूण बरयना. आपल्याक जेन्ना खंयचीय गजाल अस्वस्थ करता तेन्ना ती कवितेच्या रुपान भायर सरता. आयच्या काळांतल्या प्रस्नांक जाप दिवपाक आपूण बरयतां अशें मत ज्येश्ठ साहित्यकार मेल्विन रॉड्रिगीस हांणी मांडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
