भांगरभूंय | प्रतिनिधी
भांगरभूंय । प्रतिनिधी
मडगांवः नुवें पंचायत मंडळाचे सोमाराक जाल्ले खाशेले बसकेंत लुसिया कार्व्हालो हिची सरपंच म्हणून निवड केली. दामोदर चव्हाण परत उपसरपंच जाला. पॉल परेरा हाका फाटल्या 15 जूनाक अविस्वास थाराव हाडून सरपंचपदा वयल्यान काडले उपरांत ही सुवात रिकामी जाल्ली.
पॉल परेरा हाचे आड 6 जूनाक उपसरपंच दामोदर चव्हाण, लुसिया कार्व्हालो, मिंगेल कार्दोज, टोनी गोन्साल्वीस, जस्मिथा परेरा आनी इनासियो फर्नांडीस ह्या स पंच वांगड्यांनी अविस्वास थारावाची नोटीस दिल्ली. व्हो थाराव 6 आड 0 अश्या मतांनी पास केल्लो.सरपंच वेचून काडपा खातीर सोमाराक जाल्ले बसकेंत ह्या स जाणाच्या पंगडान लुसिया कार्व्हालो हिची सरपंच आनी चव्हाणाची उपसरपंच म्हणून निवड केली.
नावेली पंचायत वाठारांत उदरगतीचीं कामां लोकांक विस्वासात घेवन आमी करतले अशें कार्व्हालो हिणे सरपंच म्हणून वेंचून आयले उपरांत सांगलें. पावसा पयलींची कांय कामां अजून जाल्लीं नात. ती करतले तशेंच गटारां नितळ करून कोयराचो प्रस्न सुटावो करपा कडेन लक्ष दितले अशें दामोदर चव्हाणान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
