भांगरभूंय | प्रतिनिधी
दिल्ली आस्थापनाच्या गोंय मुखेल्याक अटक; हडफडें उजो प्रकरण
म्हापशें: हडफड्यां बर्च बाय रोमियो लेन ह्या नायट क्लबांत घडिल्ल्या अग्नीकोंड प्रकरणांतले मुखेल दुबावीत आरोपी आनी क्लबाचे धनी गौरव लुथरा आनी सौरभ लुथरा हांणी थायलॅण्डाक पळ काडलाे. जाल्यार क्लबाचो गोंय मुखेली करणसिंग कोहली (49, दिल्ली) हाका गोंय पुलिसांनी दिल्लींत अटक केली.
पयर 6 वेर रातीं क्लबाक उजो लागून तातूंत 25 जाणांक मरण आयिल्लें. ह्या प्रकरणांत हणजूण पुलिसांनी क्लब वेवस्थापना आड गुन्यांव दाखल केला. आपल्याक अटक जावची न्हय म्हूण दुबावीत लुथरा भावांनी थायलॅण्डाक पळ काडला आनी ते फुकेत शारांत आशिल्ल्याची म्हायती गोंय पुलिसांक मेळ्ळ्या.
उज्याची घडणूक घडले उपरांत फांतोडेर 5.30 वरांच्या विमानान दोगूय पळ काडपाक येसस्वी थारले. ह्या दोगांक धरपा खातीर दिल्लींत दाखल जाल्ल्या गोंय पुलीस पंगडान दुबाविताचे घर आनी आस्थापनाची झडटी घेतली. पूण थंय ते सांपडले नात. उपरांत दुबावीत हे देशा भायर गेल्ल्याचें दिसून आयलें.
गोंय पुलिसांच्या पंगडान दुबावीत भरत कोहली हाका सोमारा फांतोडेर अटक केली. दुबावीत हो रोमियो लेनीचो गोंय मुखेली आसून गोंयांतलो सगलो कारभार तो हाताळटालो. दुबाविताक ट्रांझीट रिमांडार आयज (मंगळारा) गोंयांत हाडटले.
मजगतीं, हणजूण पुलिसांनी ह्या प्रकरणांत अटक केल्ले राजीव निमाई मोडक (49, दिल्ली), प्रियांशू कृष्णकुमार ठाकूर (32, दिल्ली), राजीव रूद्रनाथ सिंघानिुया (32, उत्तर प्रदेश) आनी विवेक चंद्रभान सिंग (27, उत्तर प्रदेश) ह्या चौगांक म्हापशेंच्या पयलो वर्ग न्यायालयान स दिसांची पुलीस कोठी दिल्या.
हे भिरांकूळ दुर्घटणेंत पांच पर्यटक आनी 20 कर्मचारी मेळून 25 जाणांक लासून आनी घुस्मटून मरण आयिल्लें. पुलिसांनी ह्या प्रकरणांत भा. न्या. सं. च्या 105, 125, 125(अ), 125(ब), 287 आनी 3(5) कलमा खाला गुन्यांव नोंद केला.
मजगतीं, सोमारा जिल्होधिकारी अंकीत यादव हांणी अधिकाऱ्यां सयत घडणूक थळाक भेट दिवन पळोवणी केली.
क्लबाचो धनी सौरभ लुथरा हाणें घडणुकेचेर खर दुख्ख आनी खर शोक उक्तायला. बर्च बाय रोमियो लेन हांगा जाल्ल्या ह्या दुर्दैवी घडणुकेक लागून जाल्ल्या जिवीतहानी विशीं वेवस्थापन दुख्ख उक्तायता. हे घडणुकेन आमकां लेगीत धक्को बसला आनी भरून न येतल्या ह्या दुख्खाच्या आनी त्रासाच्या खिणाक संंबंदीत मरण आयिल्ल्यांच्या तशेंच जखमींच्या कुटुंबां बराबर वेवस्थापन एकवटान उबें आसा अशी पोस्ट ताणें आपल्या इस्टाग्राम अकावंटाचेर घाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
