लुथरा भावांक अटकपूर्व जामीन दिवपाक न्हयकार

भांगरभूंय | प्रतिनिधी

पणजी : हडफड्यां बर्च बाय रोमिओ लेन क्लबाचे भागिदार सौरभ आनी गौरव लुथरा हांकां दिल्लीच्या रोहिणी न्यायालयान अंतरीम अटकपूर्व जामीन दिवपाक न्हयकार दिला. मजगतीं, ह्या प्रकरणाची फुडली सुनावणी बिरेस्तारा 11 डिसेंबराक जातली. ह्या वेळार हणजूणें पुलिसांक बाजू मांडपाक सांगलां.

शेनवारा 6 डिसेंबराक मध्यानरातीर हडफडेंच्या बर्च बाय रोमिओ लेन क्लबाक भिरांकूळ उजो लागिल्लो. हे दुर्घटणेंत 25 जाणांक मरण आयिल्लें. हणजूणें पुलिसांनी बर्च बाय रोमिओ लेनचे भागिदार सौरभ लुथरा आनी गौरव लुथरा हांचे सयत हेरांचेर गुन्यांव दाखल करून चवकशी सुरू केल्या. हेच मजगतीं, सौरभ आनी गौरव लुथरा ह्या दोगांनी 7 डिसेंबराक मध्यानराती 1.17 वरांच्या सुमाराक थायलॅण्डाक पळ काडलो. ते उपरांत पुलिसांनी वयल्या प्रकरणांत राजीव निमाई मोडक (49, दिल्ली), प्रियांशू कृष्णकुमार ठाकूर (32, दिल्ली), राजीव रुद्रनाथ सिंघानिया (32, उत्तर प्रदेश) आनी विवेक चंद्रभान सिंग (27, उत्तर प्रदेश) ह्या चार वेवस्थापकांक पयलीं अटक केली. ते उपरांत पुलिसांनी क्लबाचे गोंय मुखेली भरत करणसिंग कोहली (49, दिल्ली) हाका दिल्लींतल्यान अटक करून गोंयांत हाडलो. हे मजगतीं, क्लबा कडेन संबंदीत आशिल्ले भागिदार अजय गुप्ता हाका अटक केल्या. बुधवारा 10 डिसेंबराक सकाळीं भागिदार सौरभ आनी गौरव लुथरा ह्या दोगांनी दिल्लींतल्या रोहिणी न्यायालयांत ट्रान्झीट अटकपूर्व जामीन अर्ज दाखल केला. हे संबंदांत न्यायालयांत सुनावणी जाली तेन्ना, हणजूणें पुलिसांनी वयल्या अर्जाचेर बाजू मांडपा खातीर सात दिसांची मुजत मागली. त्या वेळार सौरभ आनी गौरव लुथरा हांच्या वकिलान अंतरीम अटकपूर्व जामीन दिवपाची मागणी केली. त्या वेळार मागणी भायर मारून हणजूणें पुलिसांक बिरेस्तारा 11 डिसेंबराक बाजू मांडपाक सांगलां.

सरपंच रोशन रेडकार हांचो अटकपूर्व जामिना खातीर अर्ज

हणजूणें पुलिसांनी हडफडें- नागवाचे सरपंच रोशन रेडकार हाका आयतार 7 डिसेंबराक ताब्यांत घेतलो. हे कारवायेची खर निशेध करून रेडकार समर्थकांनी पुलीस स्टेशनाक रेवोडो घातलो आनी 5 वरांच्या बोवळा उपरांत ताची सुटका केली. मजगतीं, सरपंच रोशन रेडकार हांणी मेरशेच्या उत्तर गोंय जिल्हो आनी सत्र न्यायालयांत अटकपूर्व जामीन अर्ज दाखल केला.