भांगरभूंय | प्रतिनिधी
आरोग्यमंत्री विश्वजीत राणे हांची शिटकावणी: खडकी जालो मेगा मॅडिकल कॅम्प
वाळपय: गोंयांत भलायकेच्यो बर्यो सुविधायो आसात. गांवगिर्या पांवड्यारूय नागरिकांक बर्यो सुविधायो उपलब्ध जाल्यात. गोंय हें देशांतलें एकूच राज्य जंय वखदां फुकट दितात. येवपी काळांत नागरिकांक दर्जेदार भलायकी सुविधायो दिवपाचे यत्न जातले आनी गांवगिर्या वाठारांतल्या भलायकी केंद्रांचो दर्जो वाडोवन दर्जेदार सुविधायो दितले अशें भलायकी मंत्री विश्वजीत राणे हांणी सांगलें. पूण गोंयांत कार्यरत आशिल्लीं खाजगी हॉस्पिटलां दुयेंतींची लुटमार करता अशी म्हायती मेळ्ळ्या. असले प्रकार सहन करून घेवचों ना. ताका लागून असल्या हॉस्पिटलांचेर क्लिनिकल स्थापना कायद्या खाला कारवाय करपाची शिटकावणी तांणी दिली. तांकां कसलेच तरेची दया दाखोवची न्हय अशें मंत्र्यान म्हणलें.
भाजपा समाजीक न्याय सप्तका निमतान खोतोडा पंचायत वाठारांत खडकी हांगा श्रीराम हायस्कुलांत आयोजीत मेगा मॅडिकल कॅम्पाच्या उक्तावण सुवाळ्याक ते उलयताले. ह्या वेळार माचयेर भलायकी खात्याची संचालिका डॉ. गीता काकोडकार, खोतोडा सरपंच नामदेव राणे, नगरगांव जिल्हो पंचायत वांगडी राजश्री काळे, भलायकी अधिकारी डॉ. विकास नायक, संयोजक विनोद शिंदे, डॉ. शाम काणकोणकार, डॉ.आदीत्य काजरे, डॉ. गीता देशमूख, डॉ. अमिता कामत, श्रीराम हायस्कूल मुख्याध्यापक शिवाजी देसाय, उपसरपंच नंदीनी म्हाळशेकार, पंच रोहीदास गांवकार, सलोनी गांवकार, राजाराम परवार, प्रशिता गांवकार, प्रतिमा वंडेकार, शाळा वेवस्थापन समितीचे उपाध्यक्ष प्रेमनाथ दळवी हाजीर आशिल्ले.
मेगा मॅडिकल हांचे वरवीं गांवगिर्या वाठारांतल्या नागरिकांक बरे तरेन संद निर्माण जायत आसता. गांवगिर्या वाठारांतले जनते मदीं भलायके संबंदी सतर्कताय निर्माण जाल्ल्यान आतां मेरेन हजारांनी दुयेतींनी तपासणी करून घेतल्या. गोंयच्या विवीध भागांतल्या दुयेतींची मॅडिकल कॉलेजीचे तज्ज्ञ डॉक्टर तपासणी करतात. हाचो बरे तरेन फायदो नागरिकांक जाता अशें मंत्री राणे हांणी फुडें सांगलें.
गोंयांत जायतीं खाजगी हॉस्पिटलां आसात. तीं बरें काम करतात. पूण कांय हॉस्पिटलां आसात जातूंत फटींगपणां चालू आसात. दयानंद समाजीक सुरक्षा कार्ड वापरून दुयेंतींक फटोवपाचे यत्न सुरू आसात. निमाणें दुयेतींची स्थिती सारकीच हुस्क्याची जाल्या उपरांत दुयेतींक वैजकी म्हाविद्यालयांत धाडटात. ही गजाल सामकी खर स्वरुपाची जावन आसा. सध्या गोंयांत क्लिनीकल स्थापना कायदो चालीक लायला. ह्या कायद्या खाला उल्लेख केल्ल्या खाजगी हॉस्पिटलांचेर खर कारवाय करतले आनी गरज पडल्यार तांचे परवाने रद्द करपाची शिटकावणी भलायकी मंत्र्यान दिल्या. हे संबंदी कसलेच तरेची दया दाखोवचे ना. अश्यो प्रशासकीय अधिकार्यांक सुचोवण्यो दिल्यात अशें भलायकी मंत्री विश्वजीत राणे हांणी सांगलें.
ह्या वेळार खात्याची संचालिका डॉ. गीता काकोडकार हाणीं हाचे वरवीं नागरिकांक बरो फायदो जाता आनी दरेकल्यान दर्जेदार भलायकी तपासणीचो लाव घेवचो अशें सांगलें.
पंचायतीचे सरपंच नामदेव राणे हांणी मंत्री विश्वजीत राणे हांणी उपकार मानून प्रस्तावीक केलें. पुराय कार्यावळीचें सुत्रसंचालन डॉक्टर वैभव गाडगीळ हांणी केलें. निमाणें डॉ. विकास नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
