भांगरभूंय | प्रतिनिधी
ह्या हंगामांत तुमकां लुज मोशन (मोडशी, हागवण) जाता जाल्यार ताचे कडेन आडनदर करची न्हय. हीं कुडींतल्या टायफॉयड दुयेंसाचें लक्षण आसूं येता. सुटसुटीत हालचाल सोडल्यार टायफॉयडाच्या हेर लक्षणां विशीं उलयतना दुयेंतीक बरोच तेंप चड जोर आसूं येता, तेच बरोबर तकली दुखपा वांगडाच ताका थकिल्लें सारकें जाता. ह्या दुयेंसाचीं लक्षणां चड करून बेगीन बरीं जातात, पूण टायफॉयडाचेर वेळार उपचार करूंक ना जाल्यार धोक्याचे थारूंक शकता. टायफॉयड कित्याक लागून जाता आनी ताका कशें आडावप तें पळोवया.
टायफॉयड हो साल्मोनेला टायफी बॅक्टेरियाक लागून जावपी जोराचो एक प्रकार. ह्या गिमाळ्यांत जेवण बेगीन इबाडटा. हें शिळें अन्न वा उदक खाल्यार टायफॉयड निर्माण करपी बॅक्टेरियाची लागण रोखडीच जावंक शकता. हे बॅक्टेरिया जेवतना तोंडांतल्यान आंतकड्यांनी भितर सरतात. मागीर रगतांत भितर सरून टायफॉयडाचो जोर येता. वेळार उपचार केलो ना जाल्यार तो जीवघेणो थारूंक शकता. ह्या रोगाच्या काळांत खावपाचे संवयेची खाशेली जतनाय घेवची पडटा.
टायफॉयड दुयेंतींक पचन तंत्रांत त्रास जातात, अशे स्थितींत तांच्या आहाराची जतनाय घेवप खूब म्हत्वाचें. समतोल आहारान टायफॉयडाचें नियंत्रण करूं येता. हाचे खातीर तुमच्या आहारांत चीज, दही, दूद आनी पाचवी भाजी आसपावपाक जाय. टायफॉयड दुयेंतींचें वजन उणें जावं येता. अशा वेळार केळीं आनी बटाट खावप. टायफॉयड दुयेंतीनी आपली कूड हायड्रेटेड दवरची. हे खातीर दिसाक सात- आठ ग्लास तापोवन न्हिवयिल्लें उदक आनी ताज्या फळांपसून तयार केल्लो रोस पियेवचो.
ज्या लोकांक पयलींच पोटाची समस्या आसा वा ज्या लोकांक रोगप्रतिकार शक्त उणी आसता तांकां टायफॉयडाचो चड धोको आसूं येता. ह्या लोकांक ह्या दुयेंसाचीं लक्षणां दिसल्यार रोखडोच दोतोराचो सल्लो घेवचो.
राखण कशी करची?
हात निवळ दवरचे.
घरांत तयार केल्लें जेवण खावचें
भाजी आनी फळां धुवन खावचीं
रस्त्यार जेवण टाळचें
निवळ उदकान आयदनां धुवचीं
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
