भांगरभूंय | प्रतिनिधी
आतां मेरेन शेतकी खात्या कडेन ८ हजारां परस चड अर्ज
पणजी : दिवाळे उपरांतच्या बीगरमोसमी पावसान शेतांचें व्हड प्रमाणांत लुकसाण केलें. शेतकरी आदार निधी खाला लुकसाण भरपाये खातीर विभागी शेतकी कार्यालयांनी ८ हजारां परस चड अर्ज आयल्यात. दर दिसा अर्ज येत आसात. हाका लागून आंकडो वाडटा अशी म्हायती शेतकी खात्याचे संचालक संदीप फळदेसाय हांणी दिली.
आतां पावस वचून शीं पडपाक सुरवात जाल्या. दिवाळे उपरांत मात धा दीस सेगीत पावस पडलो. हाका लागून दिवचले, बार्देस, सत्तरी, सांगे, काणकोण ह्या सगळ्या म्हालांनी शेतांचें बरेच लुकसाण जालें. शेतकरी आदार निधी खाला हॅक्टराफाटल्यान ४० हजार प्रमाण लुकसाण भरपाय दिवपाचे मुख्यमंत्री डॉ. प्रमोद सावंत हांणी जाहीर केलां. चडांत चड ४ हॅक्टरामेरेन १ लाख ६० हजारांची लुकसाण भरपाय शेतकाराक मेळप शक्य आसा. दरेकी म्हालांतल्यान ६०० ते ७०० अर्ज आयल्यात. अर्जांचो आकडो वाडटा. अर्जा प्रमाण ३०० हॅक्टरपरस चड शेताचें लुकसाण जालां. अर्जाप्रमाण लुकसाणेची पळोवणी जातली. पळोवणे उपरांत लुकसाणेचो नेमको आंकडो कळटलो. विभागी शेतकी अधिकारी पयली अर्ज आयल्या तांची पयली पळोवणी करता, अशें शेतकी संचालक संदीप फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
