भांगरभूंय | प्रतिनिधी
गोंय उद्देगीक म्हामंडळाच्या कर्मचाऱ्यांच्या सोयऱ्यांक विकिल्ले प्लॉट परते घेवंक मेळचे नात म्हणपाची लेखी जाप मंत्र्यान एका आमदाराक दिल्या म्हणपाचें वाचूंक मेळ्ळें. म्हामंडळाच्या नेमांत अशी तजवीज ना देखून ते घेवंक मेळनात म्हणपाचें तांणी जापेंत म्हणलां. जांणी प्लॉट घेतल्यात तांकां प्लॉट दिवपाचो म्हामंडळाचो निर्णय सारको आसलो म्हणपाचें अॅडव्होकेट जनरलान सांगलां म्हणपाचेंय जापेंत आसा. आतां हें जर सगलें खरें जाल्यार आयजवेर ह्या कर्मचाऱ्यांक चवकशेच्या निमतान दडपणांत दवरले ताचें कितें? तांकां आयजवेर जाल्ल्या मनस्तापाची भरपाय कोण करतलो? एकलो तर चवकशेक भियेवनूच हार्ट अॅटेक येवन गेलो म्हणपाचें आयकूंक येता. कांय जाण अजून फॅक्टरी सुरूच करूंक पावंक नात. कांय जाणांक फॅक्टरी बांदुनूय ओकुपन्सी दिवंक ना. बँकांचे हप्ते आनी ज्यूर तर चुकच ना. ह्या सगल्या लुकसाणेची जापसालदारकी कोण घेतलो?
गोंय उद्देगीक म्हामंडळाच्या कर्मचाऱ्यांनी उद्देगीक वसणुकांतले प्लॉट आपल्या सोयर्यांच्या नांवार करून म्हामंडळ लुटलें म्हणपाचें फाटलीं साबार वर्सां आयकूंक येतालें. गोंय उद्देगीक म्हामंडळ लुकसाणींत गेलें आनी तें ह्या कर्मचाऱ्यांच्या सोयऱ्यांनी घेतिल्ल्या प्लॉटांक लागून लुकसाणींत गेलां असो सगल्यांचो समज करून दिल्लो. अर्थांत असो समज करून दिवपी आमचे राजकारणी आशिल्ले हें वेगळें सांगपाची गरज ना. तांणी केल्लीं कर्मां लिपयतले तर कर्मचाऱ्यां कडेन बोट दाखोवप सोंपें आसलें. कर्मचाऱ्यांक नोकरी करपाची आसता म्हणटकूच तांकां तोंड उगडूंक मेळना. म्हजे यादी प्रमाण आॅक्टोबर 2020 वर्सा आमच्या मुख्यमंत्र्यानूय गोंयचीं सरकारी म्हामंडळां कर्मचाऱ्यांनी लुटलीं म्हणपाचें विधान केल्लें आनी हांवें ‘भांगरभूंय’चेर तांकां जाप दिवन ते कशे चुकल्यात तें दाखयिल्लें. तरी आसतना अदीं-मदीं कर्मच्याऱ्यांनी म्हामंडळ लुटलें हेंच पालुपद आयकूंक येतालें. आनी हेंच निमित्त सांगून उद्देगीक म्हामंडळाच्या कर्मचाऱ्यांक सातव्या वेतन आयोगा पसून पयस दवरले. कर्मां कोणाचीं आनी भोग कोणाक तें पळयात.
जेन्ना म्हामंडळाच्या कर्मचाऱ्यांच्या सोयऱ्यांनी प्लॉट घेतले म्हणपाचो बोवाळ जालो तेन्ना उद्देगीक विकास म्हामंडळांत सुमार अडेजशें कर्मचारी काम करताले. आनी तांतल्या फक्त सतरा जाणांच्या सोयऱ्यांनी प्लॉट घेतिल्ले. सतरा सोयऱ्यांची ख्यास्त अडेजशें कर्मचाऱ्यांक. बरें हे प्लॉट घेवप्यांनी कितें ते फुकट घेतिल्ले तर? ना. तांणीय हेरां वरींच प्लॉटांचे मोल फारीक करून ते घेतिल्ले. मागीर ती लूट कशी जाता? आमी जाणा ते प्रमाण लुटप म्हणल्यार चोरप, फुकट बळकावप. हांगा तर कोणेच प्लॉट चोरले वा बळकायले नात. तांणी अर्ज केले, बोर्डान तांकां प्लॉट मंजूर केले आनी तांणी पयशे भरून ते घेतले. प्लॉटांची दरूय म्हामंडळान थारायिल्ली. आं, आतां कर्मचाऱ्यांचे सोयरे म्हणटकूच वयली मलय कोणाक मेळ्ळी ना जावं येता. कोणेच कसलोच नेम मोडिनासतना सगलो वेव्हार केलो जाल्यार ती लूट कशी? बरें हे प्लॉट कितें एकाच वर्सा वा एकाच दिसा घेतल्यात? आमचे म्हायती प्रमाण पयलो प्लॉट एका कर्मचाऱ्याच्या भावान बेतोडें इंडस्ट्रीयल इस्टेटींत घेतलो तो 1990 च्या अदमासाक आनी निमाणो प्लॉट घेतलो तो एका कर्मचार्याचे बायलेन 2017 च्या अदमासाक कुंडय इंडस्ट्रीयल इस्टेटींत. म्हणजेच सतरा कर्मचाऱ्यांच्या सोयऱ्यांनी सत्तावीस वर्सां मदीं हे प्लॉट घेतल्यात. ह्या सत्तवीस वर्सांच्या काळांत जायतीं सरकारां बदल्लीं, जायते संचालक म्हामंडळाच्या बोर्डार आयले, उणेंच ते स चॅरमेन जावन गेले. कोणाकूच हातूंत कसलोच दुबाव दिसलो ना? मागीर अकस्मात अशें कितें जालें जाका लागून ह्या प्लॉट घेतिल्ल्या सोयऱ्यांचेर आक्षेप आयलो? प्लाॅट घेवन कर्मचारी महामंडळा लुट्टात अशें सरकारी यंत्रणेक कित्याक दिसलें? सरकाराक कित्याक दिसलें? कोणाच्या हितसंबदाक बादा आयली? इतलीं वर्सां कर्मचारी महामंडळाक लुट्टात आनी सरकारी यंत्रणा दोळे धांपून पळेता हें आयकूंक कशेंशेंच
दिसना?
सरकार कर्मचाऱ्यांचेर आनी म्हामंडळाच्या कारभाराचेर लक्ष दवरूंक बोर्डाची स्थापना करता आनी ताचेर वेगळ्यावेगळ्या खात्यांचे सचीव डायरेक्टर म्हूण नेमता. कोणतरी मंत्री वा आमदार हो बोर्डाचो चॅरमेन आसता. म्हामंडळाचो मॅनेजींग डायरेक्टर सरकार नेमता. कर्मचारी लुट्टात तेन्ना हे सगले कितें करतात तर? ह्या बोर्डार आशिल्ल्या संचालकांची आनी चॅरमेनांची चवकशी जावंक नाका आशिल्ली? हांतल्या कितल्या जाणांनी प्लॉट घेतले हें सरकाराक खबर आसा? म्हामंडळाच्या संचालकांनी, चॅरमनांनी आनी हेरांनी आपल्या बायल- भुरग्यांच्या वा घरच्यांच्या नांवार प्लॉट घेतल्यार जाता. पूण कर्मचाऱ्यांच्या सोयऱ्यांनी घेतल्यार ती लूट. म्हामंडळां काबार कोण करतात तें सगलेच जाणात तरी आपणाली कात वाचोवंक आरोप कर्मचाऱ्यांचेर करतात अशें म्हणल्यार चूक
जातलें?
खरें म्हणल्यार जांणी कोणे प्लॉट घेवन इंडस्ट्री सुरू केली तांची तोखणाय करूंक जाय आसली. तांणी सरकारी नोकरे फाटल्यान लागनासतना ते आत्मनिर्भर जाले आनी आपले वांगडाच आनीक कांय जाणांक काम दिलें. तांची तोखणाय करची सोडून कोण तरी उंटावेलो शाणो तांचेर बगलांटां घालता आनी तांकां आरोपीच्या पांदऱ्यांत उबे करता हें कितलें सारकें? काय गोंयचे जागे फक्त भायल्यांकूच दिवपाचे आनी भायल्यांनी फेक्टऱ्यो घालून गोंयकारांनी तांचे कडेन कामाक लागपाचें असो बी कायदो आसा? गोंयकारांनी फक्त नोकरूच जावन रावपाचें? तांणी मालक जावन मिरोवंक जायना? जेन्ना कोणूय दुडू फारीक करून जागो घेता तेन्ना म्हामंडळ लुकसाणेंत कशें वचूं येता हाचोय खुलासो जावप गरजेचें. काय गोंयकारांच्या दुडवांक मोल ना?
जेन्ना कर्मचाऱ्यांच्या सोयऱ्यांनी प्लॉट घेवचे न्हय असो नेमूच ना तेन्ना हे चवकशेंत अर्थूच ना. सरकारी यंत्रणेन इतलें वर्सां मनस्ताप दिल्ले खातीर आनी कर्मचाऱ्यांक बेठेच बदनाम केल्ले खातीर ह्या कर्मचाऱ्यांची माफी मागूंक जाय आनी आडावन दवरिल्ल्यो तांच्यो सवलती, बेगिनांत बेगीन तांकां दिवंक जाय.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
