भांगरभूंय | प्रतिनिधी
-वेपाऱ्यांची मागणी मान्य करपा विशीं टेनंट असोसिएशनाचें पत्रपणजीः महानगरपालिका (मनपा) बाजारांतल्या वेपाऱ्यां कडेन लिव्ह अँड लायसन कबलात करपाक तयार आसात. पूण ही कबलात घातक आशिल्ल्यान वेपाऱ्यांनी लीज कबलातीची मागणी केल्या. मनपान लीज कबलात केल्यार सगले वेपारी थकीत भाडें फारीक करतले, अशें मार्केट टेनंट असोसिएशनाचे उपाध्यक्ष धर्मेंद्र भगत हांणी बुधवारा आमच्या प्रतिनिधी कडेन उलयतना स्पश्ट केले.
पोरण्या बाजारांतल्या वेपाऱ्यांक 2003 त नवे इमारतींत हाडटना पुराय गोंदळ जाला. पयल्या टप्प्यांत जांची नांवां नाशिल्लीं तांकांय हे इमारतींत गाळे दिल्यात. त्या वेळार आदले मुख्यमंत्री स. मनोहर पर्रीकार हांणी वेपाऱ्यां कडेन कबलात करूंक नाशिल्ली. ते उपरांत 2013 त मनपान वेपाऱ्यां कडेन लिव्ह अँड लायसन्स कबलात करपाचे यत्न सुरू केले. हे कबलातीक वेपाऱ्यांनी सुरवाती पसूनच आक्षेप घेतिल्लो. ही कबलात फक्त इकरा म्हयन्यां खातीर आशिल्ल्यान वेपाऱ्यांक ते घातक दिसता. ते बदला मनपान सुरवातीक 33 वर्सांची लीज कबलात करची आनी दर 33 वर्सांनी तीन खेपे मुजतवाड दिवची अशी वेपाऱ्यांची मागणी आशिल्ल्याचे भगत हांणी म्हणलें.
मनपान वेपाऱ्यांची ही मागणी मान्य केल्यार सगलेच वेपारी थकीत भाडें फारीक करतले, अशेंय तांणी नमूद केले.
मजगतीं, गाळ्यांचे थकीत भाडें फारीक करपा विशीं मनपान कांय दिसां पयलीं 400 वेपाऱ्यांक नोटिसो जारी केल्लो. तांचे कडल्यान 10 कोटींचे भाडें थकीत आसा. दरवर्सा मनपा वेपाऱ्यांक भाडें वसुली खातीर नोटिसो धाडटा. पूण मागणी मान्य जायनाशिल्ल्यान वेपारी थकीत भाडें फारीक करनात. ताचो व्हड फटको मनपाच्या महसुलाचेर बसला. ताका लागून भाडें वसूल करपा खातीर वेपाऱ्यां वांगडा लीज कबलात करून मनपा कायद्यांतूय दुरुस्ती करपाची मागणी आदले म्हापौर तशेंच सध्याचे नगरसेवक उदय मडकयकार हांणीय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
