भांगरभूंय | प्रतिनिधी
कोलकाता, खबरां संस्था : भारतीय टेनिस स्टार लीएंडर पेस (पायश) हाचे बापूय डाॅ. वेस (८०) हांका आयज सकाळीं मरण आयलें. भारतीय हॉकी पंगडाक कांस्य पदक जिखोवपा वांगडाच ते खेळां वैजकी शास्त्राचेय तज्ञ आशिल्ले. तांच्या मरणान खेळां मळार दुख्ख पातळ्ळां.
१९७२ त म्युनीक ऑलिंपिकांत कांस्य पदक जिखपी भारतीय हॉकी संघाचे ते वांगडी आशिल्ले. डॉ. पेस हांकां पार्किन्सन्स हें दुयेंस जाल्लें. मंगळारा सकाळीं तांकां हॉस्पिटलांत दाखल केल्ले.
भारतीय हॉकी संघात मिडफिल्डर म्हणून खेळ्ळे उपरांत डॉ. पेस हांणी खेळां मळार जायत्यो जापसालदारक्यो सांबाळ्ळ्यो. ते फुटबॉल, क्रिकेट आनी रग्बी अशे जायते खेळ खेळ्ळ्यात. १९९६ ते २००२ मजगतीं ते इंडियन रग्बी फुटबॉल युनियनचे अध्यक्ष आशिल्ले. तशेंच तांणी आशियाई क्रिकेट परिशद (ACC) आनी भारतीय क्रिकेट मंडळाच्या (BCCI) अँटी-डोपिंग शिक्षण कार्यावळींत म्हत्वाची भुमिका केल्ली.
ते स्पोर्ट्स मेडिसिनचे दोतोर आशिल्ले आनी ACC, BCCI तशेंच जायत्या खेळां संघटणांनी वैजकी सल्लागार म्हणून कार्यरत आशिल्ले. ते कोलकत्ता क्रिकेट अँड फुटबॉल क्लबाचे अध्यक्षूय आशिल्ले. डॉ. पेस हांच्या मरणा विशीं दुख्ख उक्तायतना हॉकी इंडियान तांकां खेळां मळावेलो आधारस्तंभ आनी हॉकीच्या भांगराळ्या काळांतलो मिडफिल्डर अशें म्हणलां. लिअँडर पेस आपल्या बापायक प्रेरणास्थान मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
