भांगरभूंय | प्रतिनिधी
लग्न करिनासतना एकठांय रावपाचें (लिव्ह इन रिलेशनशीप) फॅड हालिंच्या दिसांनी खूब वाडलां. चड करून शारांनी रावपी उच्चशिक्षीत तरणाटे, तरणाट्यो हांचे मदीं लिव्ह इन रिलेशनशिपांत रावपाचें प्रमाण अदीक आसा. लिव्ह इन रिलेशनशिपांत कांय म्हयने रावन पळोवप. जर एकामेकांचे सभाव पटत जाल्यार बरें. ना जाल्यार ब्रेकअप करून परतून नवो जोडिदार सोदून ताचे बरोबर लिव्ह इन रिलेशनशिपांत रावप असो हो प्रकार. जांकां लग्न संस्था मान्य ना वा लग्न करपाचें ना अशे तरणाटे, तरणाट्यो लिव्ह इन रिलेशनशिपाक चड पसंती दितात. फक्त आंकवार तरणाटेच न्हय जाल्यार घटस्फोटीत मनिसूय लिव्ह इन रिलेशनशिपांत रावपाक पसंती दितात. लिव्ह इन रिलेशनशिपा कडेन लग्न संस्थेक पर्याय म्हूण पळोवपी व्हड वर्ग समाजांत निर्माण जायत आसा. लिव्ह इन रिलेशनशिपाक कायद्यानूय मान्यताय मेळ्ळ्या.
2010 वर्सा सर्वोच्च न्यायालयान एका इतिहासीक खटल्यांत लिव्ह इन रिलेशनशीप रिलेशनशिपाक मान्यताय दिल्या. पूण ही मान्यताय दितना सर्वोच्च न्यायालयान कांय मार्गदर्शक तत्वांय जारी केल्यांत. लिव्ह इन रिलेशनशिपांत रावपी जोडप्यां खातीर हीं मार्गदर्शक तत्वां पाळप बंधनकारक आसा. अशें आसलें तरी ह्या मार्गदर्शक तत्वांक पाळो दिवप संबंदीत जोडप्यां कडल्यान जाता काय कितें? हो संशोधनाचो विशय. मुळांत लिव्ह इन रिलेशनशिपाची व्याप्तीच इतली स्पश्ट आसा की आपल्या अधिकाराची आनी कर्तव्याची लक्ष्मरेशाच ह्या जोडप्यांक समजना. ताका लागून अशा संबंदांक कालांतरान कोडुसाण निर्माण जाता. दोगांचेंय एकामेकां कडेन पटना. लग्नाच्या संबंदांत एकामेकां विशीं जो आदर आसता तो लिव्ह इन रिलेशनशीप हातूंत नासता. दोगूय एकामेकांचेर अधिकार गाजोवपाचो यत्न करतात. ताका लागून वाद वाडत वतात. तांचे मदीं मध्यस्ती करपाकूय कोण नासता. ताका लागून प्रकरण न्यायालया मेरेन पावता. लिव्ह इन रिलेशनशिपांत रावपी जोडप्यांचो न्यायालयांत पावपाचो प्रकार हालीं खूब वाडला. एकदां वाद न्यायालयांत पावलो की न्यायालयाचीं सोंपणां झरोवपाक लागतकच संबंदितांची जीण लेगीत उध्वस्त जाता. सोयरे, समाज हांचे मदींय तिरस्काराची भावना तयार जाता. कांय वेळा वाद जाल्यार इतलो तेंगशेर पावता की वादांतल्यान खून लेगीत जाता.
फाटल्या वर्सा दिल्लींतल्या श्रद्धा वालावकार हे तरणाटे चलयेचो तिच्याच लिव्ह इन रिलेशनशिपांतल्या जोडिदारान क्रूरपणान खून केल्लो. ते घडणुकेन पुराय देश हादरिल्लो. दिल्लीतले हे घडणुकेची उपरांत पुण्यातूय पुनरावृत्ती जाल्ली. लिव्ह इन रिलेशनशिपांतल्यो ह्यो घडणुको पळयत जाल्यार लिव्ह इनांत रावप कितलें सुरक्षीत आसा हाचो विचार तरणाट्यांनी करूंक जाय. लिव्ह इन रिलेशनशिपाक कायद्यान मान्यताय दिल्ली आसली तरी समाजान अजून लेगीत ताका मान्यताय दिल्ली ना. समाजान अजून लेगीत लिव्ह इन रिलेशनशिपाक स्विकारूंक ना. लिव्ह इन रिलेशनशिपांत रावपी जोडप्यां कडेन समाज कुचित्री नदरेन पळयता. म्हणल्यार ज्या सुखा खातीर लिव्ह इन रिलेशनशिपाक फक्त कायदेशीर नदरेन पळयनासतना समाजीक आनी नैतीक दृश्टीकोनांतल्यान पळयत जाल्यार कोणूय लिव्ह इन रिलेशनशिपाचें समर्थन करचो ना. बायल आनी दादलो एकामेकांक पुरक आसतात, आनी ते पुरकतायेक घटाय दिवपा खातिरूच आदल्या काळा सावन लग्न संस्था अस्तित्वांत आयल्यात.
लग्न म्हणल्यार मनशाचे संस्कृतीचो अविभाज्य घटक आसा. लग्न संस्कृतींत कांय त्रुटी आसतसूय बी, लग्न जाल्ल्या जोडप्यां मदीं पटना, तांचे मदीं वाद जायना अशें कोणूच म्हणचो ना. घोव-बायले मदीं वाद जातात. कांय जाणांचो वाद न्यायालयांतूय पावता. कांय जाणांचो घटस्फोटूय जाता म्हणून लग्न नाका, लिव्ह इन रिलेनशशीप लग्न संस्थेक पर्याय आसा अशें कोणूय समजता आसत जाल्यार तें चुकीचें. लिव्ह इन रिलेशनशीप लग्न संस्थेक पर्याय थारूंक शकना. लिव्ह इन रिलेशनशिपांत दोन वेगळ्यो लिंगी व्यक्ती एकठांय रावतात. पूण तांकां एकामेकांप्रती जबाबदारीचें भान नासता. हाचें उरफाटें लग्न जाल्ल्या व्यक्तींक एकामेकांप्रती जबाबदारीचें भान आसता. फक्त जबाबदारीच न्हय जाल्यार मोग, त्याग आनी तडजोडी बरोबरोच लग्नांत समर्पण भावनाय आसता. पूण अस्तंत्या संस्कृतीचें अंधानुकरण, भौतीकवादी दिश्टीकोन, हेरां परस कितें तरी वेगळें करून दाखोवपाची प्रवृत्ती हाका लागून शारांत चड करून मेट्रो शारांनी लग्न संस्थे कडेन आडनदर जायत आसा. आयची उच्च शिक्षीत तरणाटी पिळगी खंयचेय जबाबदारी बगर बंधनमुक्त जीण जगपाक उत्सूक आशिल्ल्याचें पळोवंक मेळटा. ताका लागून ते लिव्ह इन रिलेशनशीप हाचे कडेन वळटात. पूण तेवूय अटी आनी शर्तीचेर बेतिल्लें आशिल्ल्यान ते संबंदूय चड वेळ तिगून उरनात. ताचे परस समानताय, मोग, त्याग आनी जबाबदारीची जाण आशिल्लें लग्न लिव्ह इन रिलेशनशीप हाचे परस हजारांनी पटींनी बरे आसा हें लिव्ह इन रिलेशनशीप हाचे कडेन वळपी तरणाट्यांनी समजून घेवंक जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
