भांगरभूंय | प्रतिनिधी
डॉ. पूर्णानंद च्यारी: मिरामार धेंपे म्हाविद्यालयांत जालो एका दिसाचो राष्ट्रीय परिसंवाद
पणजीः कोंकणी मनशाक भाशे कडली आपली भुमिका कळपाक जाय. कोंकणीचें दायज मुखा वयल्या पिळग्यां खातीर राखून दवरपाक जाय. लिप्यंतराचो आनी अणकाराचो वावर कितल्योश्योच भाशीक आडमेळी पयस करतलो. हो वावर एक निरंतर सांखळ जावपाक जाय. भाशे खातीर वावुरले ना, जाल्यार मुखा वयलो काळ आमकां माफ करचो ना, अशें डॉ. पूर्णानंद च्यारी हांणी सांगलें.
मिरामारच्या धेंपे कला आनी विज्ञान म्हाविद्यालयाचो भारतीय भाशा विभाग, मुंबयचे आशावादी प्रकाशन तशेंच राजभाशा संचालनालय, गोंय सरकार हांच्या जोड पालवान आयोजीत केल्ल्या ‘कथा दायज- कन्नड आनी देवनागरी लिपयेंतली अणकारीत आनी लिप्यंतरीत कोंकणी कथा’ हो एका दिसाचो राष्ट्रीय परिसंवाद धेंपे म्हाविद्यालयाच्या सभाघरांत आयोजीत केल्लो.
ह्या परिसंवादाच्या उक्तावण सत्राक मुखेल सोयरे म्हूण दिनेश मणेरकार, उक्तावण सत्राचे अध्यक्ष डॉ. पूर्णानंद च्यारी, आशावादी प्रकाशनाचे प्रकाशक वल्ली क्वाद्रुश, प्राचार्य डॉ. वृंदा बोरकार आनी निमंत्रक अंजू साखरदांडे हाजीर आशिल्लीं.
सुरवातेक प्राचार्य डॉ. वृंदा बोरकार हांणी मानेस्तांक येवकार दिलो. अंजू साखरदांडे हांणी प्रास्तावीक करून परिसंवादा फाटलो उद्देश स्पश्ट केलो.
दिनेश मणेरकार हांणी आपल्या उलोवपांत कोंकणीत लिप्यंतर आनी अणकाराच्या आंवाठाचेर उजवाड घालो. लिप्यंतर, अणकार आनी कोंकणी भास हांकां धरून आपली खडेगांठ भुमिका डॉ. पूर्णानंद च्यारी हांणी मांडली.
परिसंवादाच्या पयल्या सत्राक अध्यक्ष म्हणून डॉ. जयंती नायक हांणी सुत्रां सांबाळ्ळीं. ह्या सत्रांत ‘कन्नड लिपयेंतली अणकारीत आनी लिप्यंतरीत कोंकणी कथा’ ह्या विशयाचेर वल्ली क्वाद्रुश, ‘कोंकणी अणकारीत आनी लिप्यंतरीत कोंकणी कथांचो तुळात्मक नदरेन वावर’ ह्या विशयाचेर दिनेश मणेरकार, ‘कन्नड ते देवनागरी लिपयेंक अणकार करतना आयिल्ले अणभव, प्रक्रिया आनी आडमेळीं’ ह्या विशयाचेर रमेश लाड आनी ‘देवनागरी लिपयेंतली अणकारीत आनी लिप्यंतरीत कोंकणी कथा’ ह्या विशयाचेर शैलेंद्र मेहता हांणी आपलें उलोवप केलें.
निमाणें अध्यक्षांनी सगळ्या उलोवपांचेर आपलें निरिक्षण मांडलें. समारोप सत्रांत शैलेंद्र मेहता हांणी आपली अध्यक्षीय भुमिका मांडली.
दामोदर कामत घाणेकार, रजत हेगडे तशेंच विद्यार्थ्यांनी परिसंवादाचेर आपले अभिप्राय दिले. कार्यावळीचें सुत्रसंचालन प्रा. विदिता शेट हांणी केलें, जाल्यार प्रा. गौरांग भांडीये हांणी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
