भांगरभूंय | प्रतिनिधी
पुलिसांनी सोद घेवपाची बदल्ली दिशा
दयानंदनगर दुचाकी अपघात प्रकरण
फोंडें: दयानंदनगर-धारबांदोड्यां राष्ट्रीय म्हामार्गार बिरेस्तारा सकाळीं जाल्ल्या अपघातांत अनवळखी वाहनाचो सोद घेवपाची दिशा बदल्ली. मोल्यां इश्टाच्या वाडदिसा निमतान आयोजीत केल्ले पार्टी खातीर लिंबू आनी कांदे उणें पडिल्ल्यान फांतोडेर दोगूय जाण दुचाकी घेवन तिस्क उसगांवां आयिल्ले. कांदे आनी लिंबू घेवन परतून वता आसतना विरुद्ध दिशेन येवपी अनवळखी वाहनाचो धपको बसून अपघात घडलो. फोंडें पुलीस अनवळखी वाहनाचो सोद घेततात.
दयानंदनगरांत बिरेस्तारा सकाळीं अनवळखी वाहनाचो धपको बसून दुचाकी चालक महमदरीफ हुसेनबाशा मोमीन (28, भुमिकानगर-उसगांव, मूळ कर्नाटक) हाका मरण आयलें. जाल्यार दुचाकीचे फाटल्यान बशिल्लो रोहीत निकोलस कुजर (20, भुमिकानगर, मूळ झारखंड) हो गंभीर जखमी जालो. पुलिसांनी बिरेस्तारा सकाळीं केल्ल्या पंचनाम्या वेळार दुचाकी चालक मोलें सावन तिस्क उसगांवचे दिशेन वचत आशिल्ल्याचें घडणूक थळार पळयले उपरांत दिसून येता. अपघात थळार पळोवणी करून ते प्रमाण पुलिसांनी पंचनामो केल्लो. पूण बिरेस्तारा सांजवेळा जखमी जाल्ल्या तरणाट्यान पुलिसांक दिल्ले जबानेंत पार्टीत लिंबू आनी कांदे उणें पडिल्ल्यान तिस्क उसगांवां येवन कांदे आनी लिंबून घेवन परतून मोल्यां वता आसतना अपघात घडिल्ल्याचें स्पश्ट केलें.
बिरेस्तारा जाल्ल्या अपघाता उपरांत फोंडें पुलिसांनी तिस्क उसगांव सावन मोलेंचे दिशेन वचपी अनवळखी वाहनाचो सोद घेवपाक सुरवात केल्ली. पूण जखमी जाल्ल्या तरणाट्यान उपचार सुरू आसतना दिल्ले जबानी उपरांत पुलिसांक तपासाची दिशा बदलची पडली.
मोल्यां इश्टान बिरेस्तारा वाडदिसा निमतान आयोजीत केल्ले पार्टींत कांदे आनी लिंबू उणें पडिल्ले. ताका लागून महमदरीफ मोमीन आनी जखमी जाल्लो रोहीत कुजर दुचाकी घेवन सकाळीं 4.30 वरांचेर तिस्क-उसगांवां आयिल्ले. आपले रावते कुडी कडेन येवन लेगीत महमदरीफ मोमीन हाणें कुटुंबांक जागयनासतना फक्त दोन मिणटां भितर परतून मोलेंचे दिशेन गेले. पूण लिंबू आनी कांदे खंयच्यान घेतले हें मात समजूंक शकूंक नाशिल्ल्यान पुलीस सद्या वेगळे दिशेन तपास करतात.
लिंबू आनी कांदे घेवन परतून वता आसतनाच अपघात घडलो. ताका लागून अपघाता उपरांत घडणूक थळा सावन धांव मारिल्लें अनवळखी वाहन फोंडें वा सांखळेचे दिशेन वचपाची शक्यताय उक्तायतात. निरिक्षक विजयनाथ कवळेंकार ह्या प्रकरणाचो अदीक तपास करतात.
मजगतीं, अनवळखी वाहनाचो सोद घेतना फोंडें पुलिसांक कांय सीसीटीव्ही कॅमेऱ्याची तपासणी केल्या. त्या वेळार दुचाकी चालक गतीन वचत आशिल्ल्याचें स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
