भांगरभूंय | प्रतिनिधी
बदलापूरांत चार वर्सां पिरायेच्या दोन चलयांचेर लिंगीक अत्याचार केल्ल्याचो आरोप आशिल्ल्या अक्षय शिंदेचो एन्कावंटर जालो आनी पयरूच एका निर्णया वेळार सर्वोच्च न्यायालयान लिंगीक शिक्षण भारतांत खूब म्हत्वाचें आसा, अशें म्हणलें. मद्रास उच्च न्यायालयाच्या निर्णयाचेर न्यायालयान ते विशीं बरेंच कितें म्हणलां. चायल्ड पोर्नोग्राफी डावनलोड करप आनी पळोवप हो पॉक्सो आनी आयटी कायद्या प्रमाण गुन्यांव अशें तांणी स्पश्ट केलां. हाचे उरफाटें, जर कोणूय गुपीतपणान मजकूर डावनलोड करून पळयता आनी तो कोणाकूच धाडपाचो, दाखोवपाचो ताचो हेतू ना, जाल्यार तो गुन्यांव न्हय, अशें मद्रास न्यायालयान म्हणिल्लें.
कितें म्हणलें सर्वोच्च न्यायालयान? “लिंगीक शिक्षणाक पश्चिमी संकल्पना मानप चुकीचें. ताका लागून तरणाट्यां मदीं अनैतिकताय वाडना. देखून हें शिक्षण भारता खातीर खूब म्हत्वाचें. तें भारतीय मुल्यां आड आसा, अशें लोक मानतात. ह्याच कारणाक लागून भोवतेक राज्यांनी ताचेर बंदी घाल्या. म्हणटकच तरणाट्यांक नेमकी म्हायती मेळना. ते इंटरनॅटा कडेन वळटात आनी थंय जायते फावट चुकीची, दिशाभूल करपी म्हायती मेळटा. महाराष्ट्रांत 900 वयर जुंवान भुरग्यांचो अभ्यास केलो तेन्ना तांकां प्रजनन, लिंगीक भलायके विशीं योग्य म्हायती नाशिल्ल्याचें दिसून आयलें. तरणाट्यांचे गैरसमज पयस करपाक जाय. तांकां लिंगीक भलायके विशीं शास्त्रीय पद्दतीन सांगपाक जाय. भुरग्यां वयले गुन्यांव हे फक्त लिंगीक शोशणा पुरतेच मर्यादीत नात. तर डिजीटल माध्यमांतले व्हिडियो, फोटो हेय लिंगीक शोशणूच. तें पळोवप, फॉरवर्ड करप बेकायदेशीर. पोक्सो कायद्यांत सुदारणा करपाची आमी संसदेक सुचोवणी करतात. चायल्ड पोर्नोग्राफी उतर बदलून बाल लिंगीक अत्याचार आनी शोशण सामुग्री अशें उतर वापरचें.”
आमच्या देशांत पॉर्न पळोवप बेकायदेशीर ना. मात कायद्यान तसले व्हिडियो तयार करप, उजवाडावप, फॉरवर्ड करप हाचेर बंदी आसा. तीन वर्सां बंदखण आनी पांच लाख रुपयांचो दंड जावं येता. लिंगीक अत्याचार आडावपाक साबार कायदे आसात. कांय वर्सां पयलीं एनडीए सरकारान बुरश्या वॅबसायटींचेर बंदी घाल्ली. मात सायबर पुलिसांच्या मतान, अजून त्यो वेगळ्या नांवान चलतात. विदेशांत तर पोर्नोग्राफी व्हिडियो करप हो कायदेशीर वेवसाय आसा. लिंगीक शिक्षण दिल्यार हें सगलें आकर्शण उणें जावं येता, अशें न्यायालयाक दिसता.
आमच्या भारतांत लिंगीक शिक्षण वा ते विशींच्यो कलाकृती, साहित्याचें उस्तुरें केन्ना कोणाक वचूंक ना. कामसुत्र हो लिंगीक विशया वयलो पयलो ग्रंथ भारतानूच संवसाराक दिलो. वात्स्यायनान. गुप्त काळांत (इसवी सन दुसर्या काय तिसर्या शेंकड्यांत) हो तत्वज्ञ पाटलीपुत्रांत (पाटणा) रावतालो. हिंदू तत्वज्ञानाक लिंगीक विशय केन्नाच आफुडभ्रश्ट नाशिल्लो. ताका तें पापूय समजनाशिल्लें. आदलीं लेणीं, शिल्पां पळयल्यार हें पट्टा. ह्या विशयाचें शिक्षणूय दिताले. मात कालांतरान सगलेंच बंद जालें. झारखंडांत जुंवान भुरग्यां खातीर 2009 त ‘उडान’ ही शिक्षणीक कार्यावळ चालीक लायिल्ली. 2019 मेरेन हजारांनी विद्यार्थ्यांक भलायकेचें शिक्षण मेळ्ळें. हातूंत लिंगीक शिक्षणाचोय आस्पाव आशिल्लो. युनेस्कोच्या अहवाला प्रमाण, फक्त 20 टक्के देशांनी लिंगीक शिक्षणा विशीं कायदे आसात. 39 टक्के देशांनी राष्ट्रीय धोरण तयार केलां. 68 टक्के देशांनी मुळावे शाळेच्या पांवड्यार तें दिवपाक जाय खंय. मात हें चालीक लागूंक ना. जुंवानपणांत पावल दवरप्यां मदीं आशिल्लो लिंगीक गिन्यानाचो उणाव आनी चुकीच्यो कल्पना ना करपाक हें शिक्षण जाय. म्हाविद्यालयांनी तर तें दिवपाकूच जाय, अशें तज्ञांक दिसता.
कांय वर्सां पयलीं लिंगीक शिक्षण दिवचें असो विचार मुखार आयिल्लो. पूण धर्माची विटंबणा जातली, संस्कृती बुडटली, अनैतिकताय, स्वैराचार वाडटलो अशें चडश्या धर्मांतल्या ‘बोलबच्चन’ लोकांक दिसपाक लागलें. तांणी विरोध केलो. मागीर लोकांच्यो भावना दुखावपाक नाका म्हूण सत्ताधिशांनी तो विशयूच कुशीक दवरिल्लो. हें शिक्षण दिल्यार समाजांत विनयभंग, बलात्कार, स्वैराचार वाडटले अशें बऱ्याच लोकांक प्रामाणीकपणान दिसता, तर शिक्षण दिल्यार हें सगलें उणें जातलें, अशें उरिल्ल्यांक दिसता. जुंवानपणाच्या हुंबऱ्यार उबे आशिल्ल्या तरणाट्यांच्या मनांतलें लिंगीकताये विशीचें आकर्शण, उमळशीक, गैरसमज, अज्ञान पयस करपाक खरें म्हणल्यार हें शिक्षण दिवपाक जाय. स्वैराचार, बलात्कार, अत्याचार, खुनाचे प्रकार ना जावप हें मात ते- ते व्यक्तीचे मानसिकतायेचेर, कायद्यांचेर अवलंबून आसा. लिंगीक शिक्षणा उपरांत ताचेर नियंत्रण येतलेंच, हाची खात्री कोण
दिवंक शकनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
