भांगरभूंय | प्रतिनिधी
सावंतवाडी : रानांत शिकारे खातीर गेल्ले कडेन बंदुकेंतल्यान उडिल्ली गुळी लागून पारपोली गुरखवाडीचो कृष्णा अर्जुन गुरव (३५) हो तरणाटो गंभीर जखमी जालो. लिंगाचे वांयगण ह्या रानांत ही घडणूक २५ डिसेंबराक घडली. जखमीचेर सध्या गोंयच्या गोमेकॉंत उपचार सुरू आसात. ताची भलायकी थीर आसा. हे विशीं सावंतवाडी पुलीस स्टेशनांत तिगांचेर गुन्यांव नोंद केला. हातुंतल्या वेदांत लक्ष्मण गुरव (२२) रविकांत वसंत गुरव (४०) ह्या दोगांक ताब्यांत घेतल्यात.
मजगतीं, वेदांत आनी रवींद्र ह्या दोगांयकूय काल २९ डिसेंबराक हांगाच्या न्यायालयांत हजर केले तेन्ना तांकां दोन दिसांची पुलीस बंदखण दिली. मजगतीं ह्या गुन्यांवांत वापरिल्ल्यो दोन ठासणीच्यो बंदुको पारपोली -गुखवाडीच्या रानांतल्यान जप्त केल्यो. हे विशींची म्हायती सावंतवाडी पुलीस निरीक्षक अमोल चव्हाण हांणी दिली.
हे घडणुकेंत जखमी जाल्लो कृष्णा गुरव हाचेर गोमॅकॉंत उपचार सुरू आशिल्ल्यान सध्या ताची भलायकी सुदारता. ताची भलायकी बरी जाले उपरांत ताचेर फुडलो कारवाय करतले, अशें पुलिसांचें म्हणणें. ह्या प्रकरणांत मुखेल दुबावीत वेदांत गुरवाच्या हातांत आशिल्ले बंदुकेची गुळी लागून कृष्णा हो जखमी जाल्लो. हे घडले उपरांत ताका हॉस्पिटलांत दाखल केल्लो. हे विशीं म्हायती मेळटांच सावंतवाडी पुलिसांनी त्या तिगांचेर गुन्यांव दाखल केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
