भांगरभूंय | प्रतिनिधी
युनिटी माॅल उबारपाचेर सरकार ठाम आसा. ते वटेन तुयें हाॅस्पिटल जीएमसी कडेन संलग्न करून मागिरूच सुरू करचें, हे मागणेक पेडणेंकार दसून रावल्यात. 25 जानेवारी मेरेन हाॅस्पिटला विशीं आस्वासन मेळना जाल्यार 28 सावन आमरण उपास करपाची शिटकावणी तुयें हाॅस्पिटल कृती समितीन दिल्या. सरकाराक बेगीन उपाय, येवजण करची पडटली. कारण आंदोलक तिडकल्यार वा भितरल्या एक- दोगांनी चुकीचें पावल उखल्ल्यार तें समाजाक मारक थारूं येता. हाचे पयलीं हो अणभव गोंयकारांनी घेतला. कांय आंदोलनां हिंसकूय जाल्यांत. पूण शक्यतो आंदोलनांच्यो निसरगांठी चर्चे वरवीं कोणाक दुखयनासतना सोडोवप बरें. तीं भरकटलीं जाल्यार मूळ मागणी फाटीं पडटा आनी वाद, गोंदळ वाडटा. संवादाचीं दारां बंद जातात. कांय जाण राजकी फायदो घेतात, पूण लोकांचे प्रस्न सुटनासतना थंयच उरतात. आवाज काडप हो अधिकार, पूण ताचो सूर इबाडूंक दिवंक जायना. लोकांच्या हिता खातीर सुरू जाल्लें आंदोलन तांकांच त्रासदायक थारपाक जायना, हाची जतनाय घेवची पडटली.
चिंबल आंदोलन पर्यावरणा कडेन संबंदीत. फुडाराक भलायकेच्यो समस्या येवं येतात, ही भिरांतूय आसा. तर तुयेंचें आंदोलन हें थेट भलायके कडेन जोडिल्लें. सामुदायीक भलायकी केंद्र हाडून लोकांक फटोवचें न्हय, तर तें हाॅस्पिटल जीएमसीकूच जोडचें अशें आंदोलक म्हणटात. ती भलायकेची गरज. कारण पेडणेंच्या लोकांक उठसूठ जीएमसींत धांवचें पडटा. सध्या धारगळे आयुर्वेदीक आयुष हाॅस्पिटल आसा. पेडण्यां अॅलोपथी उपचार घेवपीय अर्थांत आसात. म्हणटकच तुयेंचें हाॅस्पिटल जीएमसी कडेन जोडल्यार थंय बऱ्यो सुविधा मेळटल्यो. पेडणें तालुक्याच्या भलायकी, समाजीक मळाक फायदोच जातलो. 100 खाटांचीं सुविधा नदरे मुखार दवरून बांदिल्लें हें हाॅस्पिटल 2021 वर्सा पूर्ण जाल्लें. मात प्रशासकी कारणाक लागून (?) तें चालू जावंक नाशिल्लें. पूर्ण तांकीचें सुसज्ज हाॅस्पिटल म्हूण ते सुरू करतले, अशी घोशणाय जाल्ली. थंयचीं उपकरणां धुल्ल खायत पडल्यांत, इमारतीची स्थिती इबाडल्या. बांदून जाल्लो प्रकल्प तीन ते चार वर्सां तसोच दवरप हें लोकांच्या पयश्यांची नासाडी करपा सारकें न्हय? देवाच्या दर्शनाची भावीक वाट पळयतात, तशी हांगाचे लोक हाॅस्पिटलाच्या उक्तावणाची वाट पळयताले. मात ऐन वेळार हे फक्त सादें भलायकी केंद्र, अशें कानार पडिल्ल्यान ते निरशेल्यात. तिडकल्यात.
तुयें जीएमसीक लिंक केल्यार हांगा बऱ्यो सुविधा मेळटल्यो. दुयेंतींक बांबोळे येवपाची गरज पडची ना. बार्देस, दिवचल, शेजारच्या सिंधुदुर्गाकूय ताचो फायदो जातलो. म्हत्वाचें म्हणल्यार जीएमसी वयलो ताण कमी जातलो. ताका लागून हांगा व्हडलें हाॅस्पिटलूच जावचें अशीं थळाव्यांची इत्सा आसा. साधनसुविधा सुरू करपाक निविदा काडल्यात तातूंत चार म्हयन्यांची मुजत दिल्या खंय. हाचो अर्थ 30 तारखेक तें सुरू करप योग्य न्हय, असो जालो ना? विशेश म्हणल्यार थळाव्या आमदारा सयत सगल्या विचारसरणींचे लोक ह्या आंदोलनांत वांटेकार जाल्यात. मजगतीं, हें लिंक हाॅस्पिटल म्हूणच बांदिल्लें, अशें ताचे खातीर फुडाकार घेतिल्ले आदले मुख्यमंत्री लक्ष्मीकांत पार्सेकार सांगतात. तशें कांयच जावंक ना, अशें थोड्यांचें मत. कसलीच लेखी कबलात जावंक ना, आपणें ओगीच 100 कोटी मोडिल्ले जाल्यार आपणाचेर केश घालची, अशें आव्हानूय पार्सेकार हांणी सरकाराक दिलां. फाटले कांय दीस आंदोलन चलता, खरें म्हणल्यार दोन- तीन वर्सां पयलींच तें जावंक जाय आशिल्लें. हें हाॅस्पिटल लिंक कित्याक करिनात, केल्यार कोट्यांनी रुपयांचें लुकसाण जातलें, जीएमसीचेर परिणाम जातलो. नेमकें कितें जातलें, तें कळ्ळ्यार बरें. आतां लोकांक प्रतिक्षा आसा ती 30 जानेवारीची. पूण ताचे पयलीं आस्वासन मेळना जाल्यार उपास सुरू जातलो! हे जावचे आदीं ‘लिंक’ शेणलां जाल्यार बेगीन सोदचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
