भांगरभूंय | प्रतिनिधी
अहमदाबाद, खबरां संस्था ः मशिदींतल्या लावडस्पीकरा वयल्यान जावपी अजानाचेर बंदी घालची अशी मागणी केल्ली याचिका गुजरात उच्च न्यायालयान न्हयकारली. हाका लागून जावपी आवाज प्रदुशणाच्या वादाचेर न्यायालयान विचारलें, देवळांनी पुजे खातीर वा भजन- कीर्तना खातीर लावडस्पीकर वापरल्यार ताचो त्रास जायना? मध्यानरातीं 3 वरां सावन देवळांनी धोल आनी संगीता वांगडा आरती करतात. ताचो आवाज येना? घंटा आनी घड्याळांचो आवाज देवळा पुरतोच मर्यादीत उरता अशें तुमी म्हणू शकतात? तो देवळाच्या आवारांतल्यान भायर येना?
मुखेल न्यायाधीश सुनीता अग्रवाल हांणी म्हणलें, आवाज प्रदुशण हो एक शास्त्रीय विशय. तुमी डेसिबलांतल्या आंकड्यां सयत पुरावो हाडात. अजान कितलो वेळ आसता? जर ते पांच मिनटां लेगीत जायना जाल्यार हाका लागून आवाज प्रदुशणाची समस्या कशी आसूं येता? तंत्रीक नदरेन तें प्रदुशण करपी आसा हांची म्हायती दियात.
लाऊडस्पीकरचो आवाज थारायिल्ले मर्यादे परस चड आसा अशें ताचे आदीं याचिकादारान सांगलें. ताचेर न्यायालयान सांगलें, डीजेक लागूनय खूब प्रदुशण जाता. आमकां अश्या याचिकेचेर सुनावणी घेवपाची ना. हे संबंदी अलाहाबाद उच्च न्यायालयाच्या निर्णयाचो उल्लेख याचिकादारान केलो. तातूंत लाऊडस्पीकरा खातीर पुलिसांची परवानगी घेवप गरजेचें आसा अशें म्हणलां. ताचेर मुखेल न्यायाधीशान म्हणलें, अलाहाबाद उच्च न्यायालयाच्या निर्णयाक पाळो दिवपाक आमी बंधनकारक नात. अजानाची ही परंपरा शेंकड्यांनी वर्सां सावन चलत आयल्या. हाचो भौशीक पांवड्यार आनी भलायकेचेर कसो वायट परिणाम जातलो तें आमकां कळना. आवाज प्रदुशणा संबंदी दाखल केल्ल्या याचिकेंत डेसिबल वा कसलीच शास्त्रीय गजाल सांगिल्ली ना अशेंय दिसून आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
