लाला की बस्ती: 23 घरांचेर बुलडोझर

भांगरभूंय | प्रतिनिधी

म्हापशें: थिवी कोमुनिदादीचे सुवातेंत बेकायदेशीर बांदिल्ल्या औचितवाडो माडेलांतल्या लाला की बस्तींतलीं 23 घरां निमाणें मातयेभरवण केलीं. 15 वर्सांच्या न्यायालयीन प्रक्रिये उपरांत थिवी कोमुनिदादीक हें येस आयलें. उच्च न्यायालयाच्या आदेशा प्रमाण ही कारवाय केली.

काल (मंगळारा) सकाळीं उत्तर गोंय कोमुनिदाद प्रशासक कचेरेन उच्च न्यायालयाच्या आदेशाची कार्यवाही ‘अतिक्रमण हटाव’ पंगडाच्या पालवान केली. ह्या वेळार पांच पुलीस निरिक्षकां सयत 200 पुलिसांचो खर बंदोबस्त दवरिल्लो.

ह्या वेळार बार्देसचे दंडाधिकारी मामलेदार अनंत मळीक, जोड मामलेदार साईश नायक, अव्वल कारकून शैलेश कोठावळे तशेंच कोमुनिदाद अ‍ॅटर्नी सावियो परेरा हाजीर आशिल्ले.

अतिक्रमण हटाव पंगडान सकाळीं 9.30 वरांच्या सुमाराक कारवाय सुरू करून सांजवेळ मेरेन जेसीबीच्या पालवान सगलीं 23 घरां मातयेभरवण केलीं. हीं सगलीं घरां पक्कें बांदकाम करून उबारिल्लीं.

मजगतीं, कोमुनिदाद सुवातेंत बेकायदो रितीन उबारिल्ल्या 23 घरांक फेब्रुवारी म्हयन्याच्या निमाण्या सप्तकांत उत्तर गोंय कोमुनिदाद प्रशासक पांडुरंग गाड हांणी नोटीस दिवन घरां मोडपाचे निदेश दिल्ले.

तशेंच स्वता जावन बांदकामां मोडून सुवात पयली आशिल्ली तशी करपा खातीर 15 दिसांची मुजत दिल्ली. दिल्ले मुजतींत घरां मोडलीं नात जाल्यार तीं मोडून उडयतले अशी शिटकावणी प्रशासकांनी आदेशांत दिल्ली. ही मुजत 11 मार्च दिसा सोंपिल्ली. पूण ऐन वेळार ही कारवाय थांबयिल्ली.

कोमुनिदादीचे सुवाते वेलें हें बेकायदो अतिक्रमण थांबोवपा खातीर थिवी कोमुनिदाद वेवस्थापन समितीन 2008 वर्सा न्यायालयांत धांव घेतिल्ली. कनिश्ठ न्यायालयान हीं बांदकामां मोडपाचो आदेश दिल्लो. ह्या आदेशाक संबंदितांनी उच्च न्यायालयांत आव्हान दिल्लें. पूण फाटल्या 2023 वर्सा ही याचिका भायरावन कनिश्ठ न्यायालयाच्या आदेशाची कार्यवाही करपाचे निदेश उत्तर गोंय कोमुनिदाद प्रशासकांक दिल्ले.

थिवी कोमुनिदादीच्या 8 हजार चौखण मिटर सुवातेर अतिक्रमण करून हीं घरां बांदिल्लीं. हे खातीर संबंदीत अधिकाऱ्यां कडल्यान परवानगी घेवंक नाशिल्ली. हें अतिक्रमण करून जाल्ले वसणुकेक लाला की बस्ती म्हूण वळखताले. पयलीं थिये कांय स्थलांतरीत रावताले. त्या वेळार राजकी आशिर्वादाक लागून कोमुनिदाद सुवातेर अतिक्रमण करून हीं बांदकामां उबीं राविल्लीं.

ह्या कोमुनिदादीच्या जमनीचें कूळ (टेनंन्ट) म्हूण थियेचे तेन्नाचे सरपंच लाला इस्मायल बेपारी हे आशिल्ले. ताका लागून हे वसणुकेक लाला की बस्ती हें नांव दिल्लें.

न्यायालयाच्या आदेशा प्रमाण थिवी कोमुनिदादीचे सुवातेंतल्या 23 अतिक्रमणांचेर कारवाय केल्या. 15 वर्सां न्यायालयीन लड्या उपरांत कोमुनिदादीक निमाणें न्याय मेळ्ळो. राज्य सरकार, सरकारी यंत्रणा आनी कोमुनिदादीचे गांवकार हांचे मजतीन हें शक्य जालें. आमचे भारतीय न्यायालयीन प्रक्रियेक आनी सिस्टमीक लागून वेळ लागताच. पूण कोमुनिदाद सुवातेंत बिनधास्तपणान बेकायदो बांदकामां करात. कसलीच कारवाय जावची ना, असो जो समज आसा ताका ही कारवाय जाप आसा. थिवी कोमुनिनादीचे सुवाते वेलीं बेकायदो बांदकामां मोडून उडोवपाक आमी खंबीर आसात अशें थिवी कोमुनिदादीचे अ‍ॅटर्नी सावियो परेरा हांणी सांगलें.