भांगरभूंय | प्रतिनिधी
पणजी ः 2024 वर्सा राज्याच्या दर्यादेगेर आनी दुदसागर घशघशा लागसार जाल्ल्या 764 घडणुकां मदल्या लायफगार्डांनी 639 जाणांक बुडपा पसून वाटायले. ते भायर 157 वैजकी आपत्कालीन वेळार प्रथमोपचार, 146 लोकांक सुरक्षीत सुवातेर पावप आनी बेपत्ता जाल्ल्या भुरग्यांचो सोद घेवन सुरक्षीतपणान तांचे पालकांकडेन परतून दिवप अशीं म्हत्वाची कामगिरी तांणी केली. 2024 वर्सा दर्यादेगेवेल्या उदकांत आठ जाणांक मरण आयलें.
2024 वर्सा लायफगार्डांनी सुमार 950 लोकांक मजत केली. 2023 वर्सा होच आंकडो 702 आशिल्लो. वट्ट 639 बचाव कार्यात 487 भारतीय नागरिकांचो आस्पाव आशिल्लो. हांतूत सगळ्यांत चड पर्यटक कर्नाटकांतले (119) आनी महाराष्ट्रांतले (106) आशिल्ले. तशेंच बुडपा पसून वाटायल्या 120 परदेशी पर्यटकां मदीं मुखेलपणान रशियन (70) आनी ब्रिटीश (16) पर्यटक आशिल्ले.
लायफगार्डांनी सगळ्यांत चड 164 बचावकार्य कळंगुटे दर्यादेगेर केल्या. जाल्यार बागा दर्यादेगेर 147 आनी कांदोळे दर्यादेगेर 66 घडणुकांची नोंद आसा. हाचे सयत उत्तर गोंयांत वट्ट 545 घडणुकांची नोंद जाल्या. दक्षीण गोंयांत कोलवा दर्यादेगेर 38, पालोळे दर्यादेगेर 30, आनी दुदसागर घशघशार 22 घडणुको घडल्यात.
2024 वर्सा डिसेंबरांत सगळ्यांत चड 141 घडणुको घडल्यो. उपरांत ऑक्टोबरांत 117 आनी नोव्हेंबरांत 113 घडणुको घडल्यो. पिराये प्रमाण 26 ते 35 वर्सां पिरायेच्या 215 लोकांक लायफगार्डांची वाटायले. वट्ट 950 घडणुकांनी 680 दादले आनी 269 बायलांचो आस्पाव आशिल्लो.
जानेवारी ते डिसेंबर 2024 ह्या काळांत 139 भुरगीं बेपत्ता जाल्लीं. लायफगार्डांनी ह्या भुरग्यांक तांच्या पालकांच्या ताब्यांत दिले. लायफगार्डांनी 45 दर्यादेगांचेर वट्ट 157 जाणांक प्राथमिक उपचार दिले. हातूंत रस्ताद सुण्यांच्या चाबण्याक लागून जखमी जाल्ल्या 22 जाणांचो आस्पाव आसा.
ही म्हायती दृष्टि मरीनचे सीईओ नवीन अवस्थी हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
