भांगरभूंय | प्रतिनिधी
पणजी : होंडा वाठारांतल्या लागसारच्या हॉटेलां वा वेवसायीक आस्थापनांनी लायट वतकच जनरेटर वा इन्वर्टर सुरू केल्ल्यान ट्रान्सफॉर्मरांत वीज प्रवाह सुरू जावपाची शक्यताय, तपास करपी एका अभियंत्यान उक्तायली. जनरेटर तशेंच इन्वर्टर आशिल्ल्या वेवसायीक आस्थापनांची तपासणी सूरू आसा. पावसाक लागून तपासणी करपाक उशीर जाता. आजून मेरेन तपास पंगड खंयच्याच निश्कर्शा मेरेन येवंक ना, अशी म्हायती एका अभियंत्यान दिली. दोन दिसां भितर तपास अहवाल मुखेल वीज अभियंत्यांक सादर जातलो, अशें ताणें सांगलें.
लायनमॅनाक शॉक आयलो तेन्ना बंद लायनीवेल्या ट्रान्सफार्मरांत वीज प्रवाह कसो आयलो हाचो तपास वीज खात्याचे दोन पंगड करतात. दोनूय पंगड स्वतंत्रपणान अहवाल सादर करतले.
मडगांवच्या एमआरटी (मीटर रिले अॅन्ड टेस्टींग) पंगडाचे मजतीन लागींच्या घरांतल्या मिटरांची तपासणी सुरू आसा. पावसाक लागून काम करपाक आडखळी येतात, अशी म्हायती खात्याचे अधीक्षक अभियंते शैलेश बुर्ये हांणी दिली.
ह्या दोनूय तपास अहवालांचो विचार जावन निश्कर्श जारी जातलो. तपास करपी दरेकी अभियंत्यांचें मत वेगळें आसा.
होंडा – सत्तरींत फाटल्या मंगळारा दनपरां शॉक येवन चंद्रू गांवकार ह्या लायनमनाक मरण आयिल्लें. शॉक लागून आनीक एक लायनमन गंभीर जखमी जाल्लो. शटडावन घेतले उपरांत ट्रान्सफॉर्मर तशेंच लायनींत वीज प्रवाह येता काय ना, हाची तपासणी जाल्ली. तरी काम सुरू जावन वरां भितर काम सुरू आशिल्ल्या ट्रान्सफॉर्मरात वीज प्रवाह (करंट) आयलो, हें नेमकें कित्याक लागून जालें, ताचो तपास चलता. होंडांच न्हय, तर हेरकडेनूय इन्व्हर्टराक लागून शाॅक येवपाच्यो घडणुको घडटल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
