भांगरभूंय | प्रतिनिधी
सुदिन ढवळीकारः अभियांत्रिकी म्हाविद्यालया कडल्यान वीज सुरक्षा उपकरणांची निर्मिती
भांगरभूंय । प्रतिनिधी
पणजी : विजेच्या लायनी कडल्याव 1 ते 1.5 मिटर अंतरा मेरेन विजेचो प्रवाह सुचीत करपी हॅल्मेटां आनी रिस्ट बेल्ट (हाताचे पट्टे) लायनमनाक दितले, अशी म्हायती वीजमंत्री सुदिन ढवळीकार हांणी दिली. लायनमना खातीर सुरक्षेच्या दिश्टीकोनांतल्यान हाचो खूब फायदो जातलो, अशें तांणी सांगलें.
ट्रान्सफॉर्मर तशेंच सबस्टेशनाचेर वीज पुरवण बंद केली तरी कांय वेळार इन्वर्टराक लागून लायनींतल्यान वीज प्रवाह (करंट) सुरू जाता. हाका लागून लायनीचेर काम करप लायनमनाक धोक्याचें थारता. काय दिसां आदीं इन्वर्टराक लागून बंद केल्ल्या लायनीर विजेचो प्रवाह येवन लायनमनाक मरण येवपाची घडणूक घडिल्ली. हे फाटभुंयेर वीज प्रवाह सुचीत करपी हॅल्मेट आनी रिस्ट बेल्ट पुरक थारतलो. तकलेचेर हॅल्मेट आनी रिस्ट बेल्ट बांदून खांबार चडले उपरांत लायनीचेर वीज प्रवाह सुरू आसलो जाल्यार हॅल्मेटाची लायट पेट्टली तशेंच आवाजूय येतलो. रिस्ट बेल्ट लेगीत अशेच तरेन आवाज करतलो आनी लायट पेट्टली. सबस्टेशन तशेंच ट्रान्सफॉर्मराचेर काम करतना हाचो उपेग जातलो.
वीज प्रवाह सुचीत करपी हॅल्मेट आनी हाताच्या बेल्टाच्या तंत्रज्ञान गोंय अभियांत्रिकी म्हाविद्यालयाच्या दोन विद्यार्थ्यांनी तयार केलां. तनय कुरतरकार आनी अभिनव नायक हांणी हे हॅल्मेट तशेंच रिस्ट बेल्टाची निर्मिती केल्या. इलेक्ट्रिकल इंजिनियरींगचे प्राध्यापक जयेश प्रियोळकार आनी मुखेल जी. आर. कुंकळ्येकार हांच्या मार्गदर्शना खाला तंत्रज्ञान तयार केलां. पत्रकार परिशदेंत तंत्रज्ञान तशेंच उपकरणाची म्हायती दिली. ह्या वेळार म्हाविद्यालयाचे प्राचार्य डॉ. कृपाशंकर सिंग, मुखेल वीज अभियंते स्टीफन फर्नांडीस हाजीर आसले. हॅल्मेट तशेंच रिस्ट बेल्टाचें व्हड प्रमाणांत उत्पादन करपा विशींचो निर्णय सरकार घेतलो. निर्मितीचे पेटंट म्हाविद्यालया कडेन दवरून कंपनी वतीन उत्पादन करपाचो पर्याय आसा. हे विशींचो निर्णय जावपाचो आसा. तरी फुडाराक सगळया लायनमनाक हॅल्मेट तशेंच रिस्ट बेल्टाचे (व्रिस्ट बेल्ट) वांटप जातलें, अशें वीज मंत्री ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
