भांगरभूंय | प्रतिनिधी
मंत्री सुदीन ढवळीकार: पणजे मनयलो राष्ट्रीय ऊर्जा संवर्धन दीस
पणजी: लायट वाटावपा खातीर लोकांमदी जागृताय करपाची गरज आशिल्ल्याचें वीज मंत्री सुदीन ढवळीकार हांणी सांगलें. ते वीज खात्याच्या राज्य नियुक्त एजन्सीन पणजे हांगा आयोजीत राष्ट्रीय ऊर्जा संवर्धन दीस कार्यावळींत एनर्जी क्लब मॅन्युअलाचें प्रकाशन केल्या उपरांत उलयताले.
वीज सचीव अजीत रॉय, मुखेल वीज अभियंते स्टिफन फर्नांडीस, गोंय विज्ञान केंद्राचे संचालक विलास चौधरी, अधिक्षक अभियंते मयूर हेदे आनी वीज खात्याचे नोडल अधिकारी राजीव सामंत हे कार्यावळीक हाजीर आशिल्ले.
ऊर्जा बचती बाबतींत सतत यत्न केल्ल्यान गिरायकांक दर्जेदार वीज उपलब्ध करप शक्य जालां. ऊर्जा संवर्धना वांगाडाच पर्यावरण सांबाळपाची गरज आसा, अशें सांगून ढवळीकार हांणी एनर्जी क्लब मॅन्युअल राज्यांतल्या सगळ्या शिक्षणीक संस्थांनी आनी शाळांनी पावयतले अशें सांगलें.
वीज खात्या वतीन खूबश्या सर्तींचें आयोजन करून तशेंच मोबायल व्हॅनींतल्यान दरेक म्हाल, मुळावी शाळा आनी उच्च माध्यमीक शाळांनी भेट दिवन वीज बचती विशीं जागृताय करता, अशेंय वीज मंत्र्यान ह्या वेळार सांगलें.
ह्या वेळार वीज मंत्र्या हस्तुकीं गोंय विज्ञान केंद्रान वीज खात्याच्या सहकार्यान आयोजीत केल्ल्या निबंध आनी चित्रकला सर्तींतल्या जैतवंतांक इनामां भेटयलीं.
वीज सचीव अजित रॉय हांणी, लायट वाटोवप हो जिणेचो एक वांटो आशिल्ल्याचे सांगून लायट वाटावपा खातीर विद्यार्थी म्हत्वाची भुमिका करपाक शकतात, अशें सांगलें. विजेचो योग्य वापर करून वीज बचत करपा खातीर प्रत्येकान यत्न करपाची गरज आसा, अशेंय तांणी सांगलें.
मुखेल वीज अभियंते स्टिफन फर्नांडीस हांचेंय ह्या वेळार भाशण जालें.
सुरवातेक राजीव सामंत हांणी मानेस्तांक येवकार दिलो. जाल्यार मयूर हेदे हांणी निमाणें उपकार मानले.
प्रवीण सबनीस हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
