भांगरभूंय | प्रतिनिधी
पावस आनी वाऱ्याची नाचा-नाची सुरू जाली काय लायट रागार फुगार जाता आसतली. गोंयांत तरी जाता. मात्सो वारो व्हांवपाक लागलो, गडगड्याचो आवाज कानार पडलो काय लायट चल्ली. ती केन्ना येत तें कोणूच साांगपाक शकनात. पावसाच्या दिसांनी झाडां पडून लायट वता ती समजू येता. फक्त लायटीचो दिवो आशिल्ले खांबे दवरून सगल्यो सरयो जमनी पोंदच्यान वतल्यो तेन्नाच ही समस्या सुटावी जातली. कांय कडेन खांब्या वयल्यान एकूच केबल व्हेल्ली दिसता. भुंयगत वीज पुरवण म्हणल्यार नेमकें कितें तें सामान्य भौसाक कळना जालां. फाटल्या मार्च, एप्रिलांत कांय गांवांनी अंडरग्रांवड केबल घाल्यात. पूण फाटले तीन म्हयने काम परतून सुरू जावंक ना. फाटलो म्हयनोभर दीस दिवचल, फोंडें, पेडणें म्हालांत वीज आपालीपा खेळटा. बिठ्ठोणा सारक्या राजधानी पणजेक तेंकून आशिल्ल्या गांवांत फाटल्या सप्तकांत दर दोन दिसांनी 3 ते 5 वरां लायट गुल्ल जाताली. मागीर गांवांत कितें जाता आसतलें? सोशल मिडियाचेर केन्नाय कोण लायटी संबंदी पोस्ट घालता, राग उक्तायता. पूण अशें धाडस करपी मेजकेच. थळाव्या सरपंचाक, आमदाराक कितें दिसतलें, हाची भिरांत चडश्या लोकांक दिसता. मागीर कोणाक जाय त्यो भानगडी म्हणीत, ते घरचे घरा वीज खात्याक गाळी संवून वड्याचें तेल वांयग्यार काडटात. दिसांतल्यान वीज नेमकी कितले फावटी आपालीपा खेळटा, तें संबंदीत गांवांतल्या लोकांक चड बरें खबर आसतलें.
आदलो काळ आतां उरूंक ना. आतां भोवतेक गरजेचीं उपकरणां लायटीचेर चलतात. नळ्यांचीं घरां फक्त गांवांनी उरल्यांत. फ्लॅटांनी फॅन, एसी बगर रावप शक्य ना. मिक्सर, टिव्ही, गिझरा खातीर लायट जाय. मोबायल, संगणक ही जिणेंगरजेची वस्त जाल्या. कारण घरांतल्यान काम करपी लोकांचो आंकडो वाडला. दीसभर वीजपुरवण बंद उरल्यार कांय लोक तर अक्षरशा अस्वस्थ जातात. उद्देजकांक लायटी बगर उद्देग चलोवपाक मेळना. हें गोंयां खातीर मारक थारूं येता. वेपाऱ्यांकूय त्रास जातात. दूद, मांस इबाडटा. उद्देग मळ नेटान धांवपाक जाय जाल्यार 24 वरां वीजपुरवण आसप गरजेचें. लायट ना जाल्यार उदका पुरवणेचेरुय परिणाम जाता, हें कोणे विसरचें न्हय. शारांनी सहसा लायट वचना, पूण गांवांनी सकाळीं 10 वरांचेर गेल्ली लायट जेन्ना सांजची सातांक येता वा रातभर लायटी बगर न्हिदचें पडटा, तेन्ना कितें भोगता तें तांचें तांकांच खबर.
हालींच लायटीचें बील वाडलां. तातूंत सेवा करूय आसता. पूण सेवा दिवपाचे बाबतींत वीज खातें तत्पर आसा, अशें म्हणपाक मेळचें ना. लोकांच्यो प्रतिक्रिया पळयल्यार तशेंच दिसता. भूंयगत लायटीच्या कामाक वेग दिवपाक जाय. ताचे पयलीं राज्याक आनी राज्यांत खाची कोनशांनी वीजपुरवण करपी यंत्रणा सुदारपाक जाय. नव्यो सरयो, ट्रान्स्फाॅर्मर, उपकेंद्रां सामकीं गरजेचीं. मोलेंच्यान गोंयांत लायट येवपाची आशिल्ली तिचें कितें जालें? हें काम बेगीन जावचें. गोंय हें पर्यटन राज्य. ह्या मळाक मेळटा तितली लायट उणीच. आसा ते यंत्रणेंत चड लायट ओडपाची, खेळोवपाची तांक आसा काय, हाची खात्री दिवं नज. म्हणटकच नवी यंत्रणा आनी चड लायट ही गोंयची फुडल्या काळाची गरज. ती पुराय करपाक आतां पसूनच कामाक लागपाक जाय. डिझेलाचे जनरेटर कितलो तेंप धडधडटले?
40 वर्सां आदली वीज यंत्रणा कांय गांवांनी अजून पळोवपाक मेळटा. टप्प्या टप्प्यान ती इल्ली इल्ली करून बदलपाक जाय. दर आयतारा खंय ना खंय तरी 5 ते 7 वरां दुरुस्तीच्या नांवा खाला लायट बंद दवरतात. तें पसून सोंसप आयज लोकांक कठीण जालां, कारण वयर सांगलां प्रमाण आमी लायटीचे गुलाम जाल्यात. तिचे बगर आमी असहाय्य. धोकादायक झाडां, लायटीच्या सरयां वयर आशिल्ले झाडांचे खांदे मारपाची मेकळीक वीज खात्याक दिवंक फावो. कारण वीज कामगार आयले काय लोक तांचे कडेन वाद घालतात. कांय झाडां कापपाक सरकाराचो परवानो घेवचो पडटा. ह्या पावसांत खूब झाडां पडल्यांत. तातूंत घरां, मोटारींचें लुकसाण जालां.
लायटी खातीर लोक पयशे मोडटात, मागीर तांकां 24 वरां लायट दिवंक नाका? दुर्घटनां जातात तेन्ना एक समजूं येता. वीज खात्यान हें मनार घेवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
