भांगरभूंय | प्रतिनिधी
चवथी खातीर घरच्यां सयत करतालो सजावट
भांगरभूंय । प्रतिनिधी
म्हापशें: ओळावली पोंबुर्फा चवथी निमतान सजावट करतना लायटीचो शॉक लागून यश्मीत रामकृष्ण च्यारी (17) हाका मरण आयलें. ही घडणूक शेनवारा राती कडेन घडली.
म्हापशें पुलिसांनी दिल्ले म्हायती प्रमाण यश्मीत आनी ताचीं घरचीं चवथी खातीर घरांत सजावट करताले. ह्या वेळार यश्मीताचो विद्यूतभारीत सरयेक स्पर्श जालो. उपरांत तो जमनीचेर कोसळ्ळो. घरच्यांनी ताका ताकतिकेन हळदोणेंच्या मुळाव्या भलायकी केंद्रांत दाखल केलो. पूण थंयच्या दोतोरांनी ताका मरण आयिल्ल्याचें जाहीर केलें.
यश्मीत यत्ता इकरावेंत शिकतालो. ताका एक धाकटो भाव आसा. बापूय मेस्तकाम करता. जाल्यार आवय घर सांबाळटा. यश्मीताचे कुडीचेर आयतारा निमाणे संस्कार केले. म्हापशेंचे पुलीस उपनिरिक्षक आशिश परब हांणी घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
