भांगरभूंय | प्रतिनिधी
अच्छे दिन आनेवाले है, हीं उतरां मनांत घोळयत, एक ना एक दीस आपली परिस्थिती सुदारतली ही आस्त काळजांत केळयत आनी एक दीस म्हारगाय देंवतली आनी घरांत आपूण नव्यो नव्यो वस्तू हाडून घर सजयतलों अशीं सपनां रंगयत दरेका सामान्य मनशाचें जगप चालू आसा. पूण म्हारगाय देंवपाचें नांव काडिना. म्हारगायेचो हो राकेस आपल्या उज्यांत गिरेस्त, गरीब असो भेद करिनासतना सगल्यांक हुलपायत आसा. आयज म्हारगायेन इतली तेंगशी गांठल्या की आयज आशिल्लो दर फाल्यां आसतच म्हणून सांगूंक जायना. जोडिल्लो पयसो पावना. खर्चाचो ताळमेळ बसना. दुसरे वटेन जीएसटीच्या नांवान वेपारी आनी दुकानदार म्हालाचो दर वाडयत आसात. जगप कशें, खावप कितें अशे विवंचनेंत सगलेच आसात. वाहनांक लागपी पॅत्राॅल शंबरी गांठपाचे तयारेंत आसा. रांदपाच्या गॅसान जाल्यार एक हजारांचो आंकडो केन्ना हुपला. अशे परिस्थितींत ‘वता तो दीस खरो’ अशें म्हणून जगपी गोंयकारांक वीज खात्यान शाॅकाद शाॅक दिला.
गोंय सरकारान एक एप्रील सावन लायटीच्या बिलांत वाड केल्या आनी म्हारगायेच्या उज्यांत तेल ओतलां. ज्युस्त गरमेच्या दिसांनी लायटीच्या बिलांत वाड केल्ल्यान मनांत आसूं वा नासूं वाडीव बिल गिरायकांक फारीक करचेंच पडटलें. कारण सध्या गरमी इतली वाडल्या की फॅन, कूलर वा एसी नासतना कोणूच एक मिनीट लेगीत रावंक शकना. चड फॅन लायिल्ल्यान वा दीसभर एसी चालू दवरिल्ल्यान बिल वाडलां आसुये अशें म्हणून सामान्य मनीस बोल्साक परवडना तरी तोंड धांपून वाडिल्लें बिल फारीक करतलो हातूंत दुबावूच ना.
आतां पावस लागीं पावला. पावसांत फॅनाची आनी एसीची गरज नासता. तरी लायटीचें बिल आदले परस कमी येतलें हाची शाश्वती आसा? मिटर रिडर अचूक रिडींग करून बिल दितले हाची गारांती आसा? ना. कारण खूब फावटी मिटर रिडर मनाक मारता तशें रिडींग करता आनी चडावत बिल गिरायकांच्या माथ्यार मारता. मागीर हीं बिलां दुरूस्त करपा खातीर गिरायकाक वीज खात्यांत फावटी मारच्यो पडल्यार पडूं. तांकां तांचें पडिल्लें नासता. हें अशें कित्याक घडटा? कामा कडेन हलगर्जी करतल्या आनी बेफिकीरीन वागतल्या ह्या मिटर रिडरांक विचारपी कोण ना? ज्युस्ताज्युस्त रिडींग करून बिल दिवपाक ह्या मिटर रिडरांक कितें जाता? काय चडावत बिल दिवपांतूच तांकां आसुरी आनंद मेळटा?
आदीं हें मिटर रिडर रिडींग करतकच हाडिल्लें लायटीचें बिल घराच्या दाराक लायताले वा घरांत हाडून दिताले. आतां तांणी तशें करप सोडून दिलां. ते सरळ मिटराच्या बाॅक्साचेरच बिलां दवरतात. तीं बिलां मागीर कोणेंय व्हरूं, खंयूय पडूं, ताचें कितेंय जावं, कोणाक पडलां गा!
एक-दोन माळयो वयर चडून दाराच्या खिळयांचेर बिलां दवरपाची वा घराची बेल मारून घरधनयांच्या हातांत बिल दिवपाची तकालस घेवपाक आयचे मिटर रिडर तयार नात. अभियंत्याच्या कानार मिटर रिडरांची हीं कर्तुबां घालीं जाल्यार तो म्हणटा ः आतां इमारती वाडल्यात. दरेके इमारतीक चार-पांच माळयो आसतात. सगल्यो माळ्यो चडून दरेकाक लायटीचें बिल दिवप मिटर रिडराक शक्य ना.
हाचो अर्थ कितें? पोस्टमन माळयो चडून त्या-त्या घरांनी पोस्ट वा पार्सल व्हरून दिता, कुरियरवालो त्या-त्या घरांनी कुरियर पावयता, उदकाचें बिल घेवन येवपी मिटर रिडर त्या- त्या दारांच्या खिळयांचेर बिलां दवरून वता. मागीर वीज खात्यांतल्याच मिटर रिडरांक त्या- त्या घरांच्या दारांचेर बिल दवरप कमीपणाचें दिसता? वा तशे त्रास काडपाक ते तयार नात? लायटीचीं बिलां मिटर बाॅक्सांचेर दवरून वचपी मिटर रिडरांच्या पावलार पावल दवरून उदकाचीं बिलां घेवन येवपी मिटर रिडरय फाल्यां लायटीच्या त्याच मिटर बाॅक्सांचेर बिलां दवरून वचचो ना कित्या वयल्यान?
खरें म्हणल्यार मनाक मारता तशीं बिलां तयार करपी मिटर रिडरांचेर कारवाय जावंक जाय. तांचेर बडी बसूंक जाय. तांकां समज दिवंक जाय. कारण तांची ही बेफिकीर वृत्ती वीज गिरायकांक त्रासाची, कटकटीची थारता. वाडीव बिल दुरूस्त करपाक वीज गिरायकांक वीज खात्याच्या कार्यालयांत फावटीं मारच्यो पडटात. तांचो वेळ आनी पयसो फुकट वता. चूक कोणाची ख्यास्त कोणाक?
वीज खात्याची आनीक एक अजापाची रीत. मिटर रिडर मिटर रिडींग करपाक चुकला आसत वा बिल करतना बिलींग क्लार्क गडबडला आसत, ताणें भरमसाट बिल केलां आसत तर संबंदीत अधिकारी तांची चूक म्हणिनासतना वीज गिरायकांक सांगता ः आदीं हें वाडीव बिल फारीक करात. फुडल्या बिलांत उणे करूया. हाचे फाटलें ‘लाॅजिक’ म्हाका अजून कळूंक ना. कोणेय चुकून चड बिल केलां आसत जाल्यार त्याच वेळार तें बिल उणें करूंक जायना? आदीं बिलाचे पयशे फारीक कर, उपरांत पळोवया ही पद्दत कसली?
वीज खातें दर वर्सा पावस लागीं पावलो की पावसाळोपूर्व कामाचें निमित्त घेवन दुरूस्तीच्या नांवा खाला वीज पुरवण वरांचीं वरां बंद दवरता. तरी आसतना पावसाच्या दिसांनी लायट वताच. पावसूच पडूंक जाय म्हणून ना, सादें पावशीं वारें आयल्यार लेगीत लायट वता. लायटीचे केबल भुंयगत आसुनूय लायट कशी वता? कोणा कडेन जाप ना.
वीज मंत्री सुदिन ढवळीकार गोंयकारांक सुरळीत वीज मेळटली हे खातीर वावुरतात. विजेच्या मळार सुदारणा करूंक येवजण्यो आंखतात. तांणी ह्या प्रकरणांत लक्ष घालचें आनी कोणाकूच भरमसाट बिलां येवचीं नात, कोणाकूच वीज खात्याच्या कार्यालयांनी बिलांची दुरूस्ती करपा खातीर फावटी पडच्यो नात हाची खात्री करची. वीज मंत्री हातूंत लक्ष घालतले व्हय?
अतुल र. पंडित
9623269013
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
