लायटीचीं बिलां…..

भांगरभूंय | प्रतिनिधी

आमचें गोंय हें ‘पर्यटन राज्य’ आशिल्ल्यान मेळटा तितली वीज उणीच. फुडाराक विजेची मागणी वाडत वतली. ताका लागून गोंयची वीज यंत्रणा सुदारपाची, आधुनीक करपाची गरज आसा.

सरकार उदक, वीज अश्यो साबार सुविधा दिता. ते खातीर लोकां कडल्यान पयशे घेता. सुविधा- सेवा सुदारपाक, तांची अदीं मदीं दुरुस्ती, आधुनिकीकरण करपाक आनी हेर बऱ्याच कामां खातीर बिलांच्या रुपांत मेळिल्लो हो पयसो मागीर सरकार खर्च करता. ताका लागून गिरायकांनी नेमान बील फारीक करपाक जाय. ती तांची लागणूक. मात, दोन दिसां पयलीं वीज अधिक्षक अभियंत्यान बिला विशीं धपको दिवपी गजाल जाहीर केली. गोंयांतल्या 1 लाख 30 हजार 87 वीज गिरायकांनी वट्ट 181 कोटी रुपयाची रक्कम अजून फारीक करूंक ना. काल 27 मार्च मेरेनची ही थकबाकी. 181 कोटी ही ल्हान रक्कम न्हय. इतलो तेंप वीज खातें ओगी कशें रावलें? तांणी गिरायक बिलां फारीक करतलें, हे खातीर यत्न करूंक ना? केल्यात जाल्यार गिरायकांचेर कारवाय कित्याक करूंक ना? मदीं एक- रकमी बील फारीक करपाची येवजण सुरू केल्ली, तिचें कितें जालें? ह्या कोट्यांनी रुपयांनी वीज खात्यांतूच बरीच सुदारणा करप शक्य आसा. तेन्ना निदान आतां सरकारान ते खातीर पेंगट बांदून वावराक लागचें पडटलें!
हे वीज थकबाकीदार कोण? सगलेच तातूंत आसात. पूण 68 टक्के थकबाकीदार उद्देगीक गिरायकां. घरगुती गिरायकां कडल्यान 24 कोटी 66 लाख रुपया (13.62 टक्के) येवपाचे आसात. तर वेवसायीक कनेक्शन घेतिल्ल्यां कडल्यान 30 कोटी 82 लाख रुपया (17.02 टक्के) थकबाकी येवपाची आसा. कृशी गिरायकां 1 कोटी 86 लाख रुपया देवीज आसात. उरिल्लीं थकबाकी उद्देगीक गिरायकांची!! फोंडे तालुक्यांत सगल्यांत चड 35.61 कोटी रुपया थकबाकी आसा. मागीर दिवचल 32.87 कोटी आनी सांगें 23.08 कोटी रुपया हांचो क्रमांक लागता. तिसवाडी, बार्देस तांचे उपरांत. घरगुती गिरायकां मदीं बार्देसांतल्यान (6.08 कोटी) चड पयशे येवपाचे आसात.
थकिल्लीं बिलां लोकांनी, उद्देगांनी फारीक करचीं म्हूण वीज खात्यान दोन खेपे ‘वन टायम सेटलमेंट’ येवजण सुरू केल्ली. तिका प्रतिसादूय मेळ्ळो. मात तरीय 181 कोटी येवपाचे आसात, अशें वीज खातें म्हणटा. त्या वेळार थकबाकीदारां आड खर मोहीम सुरू केल्ली. बिलां फारीक करूंक नात, जाल्यार वीज कनेक्शन सोमतेच तोडटले, अशेंय जाहीर केल्लें. मात, हें प्रत्यक्षांत जालें काय ना? आतांय तशें करप कठीण आसा. कारण चडशे थकबाकीदार उद्देग, वेवसाय मळा वयले आसात…. आनी हालीं विजे बगर कितेंच करपाक मेळना. लायटीचें कनेक्शन काडलें जाल्यार ताचो परिणाम उद्देग मळाचेर, पर्यायान गोंयचे अर्थवेवस्थेचेर जातलो. म्हणटकच तांकां बिलाचे थकिल्ले पयशे फारीक करपाक परतून संद दिवचीच पडटली. नाजाल्यार सक्ती आनी युक्ती करून तांच्या बोल्सांतल्यान नकळटां बिलाचे पयशे काडचे पडटले.
गोंयांत वीज येता ती सगली भायल्यान हाडची पडटा. ती राज्याच्या खाची कोनशांनी व्हरपाचें जाळें हे घडयेक पसून दुरुस्त करपाची गरज आसा. कारण बरेच कडेन सरयो, ट्रान्स्फोर्मर पोरणें आसात. मात्सो लोड आयलो जाल्यार लायट गायब जाता. गोंयची विजेची गरज वाडल्या. ताचे फाटलें कारण सांगपाची गरज ना. एक तर विजेचेर चलपी उपकरणांचो खाची- कोनशांची प्रसार जाला आनी आमचें गोंय हें ‘पर्यटन राज्य’ आशिल्ल्यान मेळटा तितली वीज उणीच पडटा. फुडाराक विजेची मागणी वाडत वतली. ताका लागून गोंयची वीज यंत्रणा सुदारपाची, आधुनीक करपाची गरज आसा. ‘तमनार’ हें काम करता. तांच्या कामाक वेग येतलो हाचेर सरकारान नदर दवरपाक जाय. लोकांचेरूय व्हडली जापसालदारकी आसा. ती म्हणल्यार बिलां वेळार फारीक करपाक जाय. खास करून उद्देगीक आनी वेवसायीक गिरायकांनी. तीं सांठयत दवरलीं जाल्यार मागीर बिलांचो आंकडो वाडत वता आनी पयशे भरप कुस्तार जाता. विजेची बचत प्रत्येकान करपाक जाय. शालेय पांवड्याचेर अजून ते विशीं शिकोवपाची गरज आसा. आयचे भुरगे, जाण्टे पसून कुडींत कोण नासलो तरी लायटी, फॅन, एसी चालूच दवरतात. राज्यांतल्या लाखभर कुटुंबांनी सद्दां ही बेपर्वाय केली, जाल्यार कितली वीज कारणा बगर फुकट वतली आनी त्या प्रत्येकाक कितलें बील येतलें, हाची फक्त कल्पना करची! म्हणटकच सगल्या गोंयकारांनी विजेची बचत करची, वीज खात्यान अखंड वीज पुरवण जातली हाची जतनाय घेवची… आनी सगल्यांनी नेमान बिलां भरचीं. ताचो फायदो आमकां आनी आमच्या राज्याकूच जातलो!!