भांगरभूंय | प्रतिनिधी
हेमा नायक : तिसऱ्या युवा कोंकणी कथा संमेलनाचें दबाज्यान उक्तावण
भांगरभूंय । प्रतिनिधी
पणजीः आयचे युवा साहित्यीक आपलें साहित्य फेसबूक, व्हॉट्सअॅप सारक्या सोशल मिडियाचेर घालतात. पूण तांणी ताचेर मेळपी लायक आनी शॅरांचेर निंबून रावचे न्हय. लायक्सां खातीर तांणी आपल्या साहित्याचो दर्जो व्हगडावचो न्हय. नव्यो नव्यो अप्रुपाच्यो गजाली जाणून घेवप चड गरजेच्यो आसात, अशी सुचोवणी ज्येश्ठ साहित्यीक हेमा नायक हांणी युवा कथाकारांक केली.
गोंय विद्यापीठ, शणै गोंयबाब भाशा आनी साहित्य म्हाशाळेचो कोंकणी अध्ययन फांटो आनी कोंकणी सरस्पत मंडळ हांच्या जोडपालवान गोंय विद्यापीठांत 3 रें युवा कोंकणी कथा संमेलन घडोवन हाडलें. ह्या वेळार मुखेल सोयरी म्हूण हेमा नायक उलयताली. तांचे वांगडा माचयेर शणै गोंयबाब भाशा आनी साहित्य म्हाशाळेचे अधिश्ठाता डॉ. प्रकाश पर्येंकार, संमेलनाचे अध्यक्ष रामनाथ गावडे, शणै गोंयबाब भाशा आनी साहित्य म्हाशाळेच्या कोंकणी अध्ययन फांट्याचे संचालक डॉ. हनुमंत चोपडेंकार, संमेलनाची कार्याध्यक्ष सहाय्यक प्राध्यापक सानिका गांवकार आनी कोंकणी सरस्पत मंडळाची अध्यक्ष राणी कामत हजर आशिल्ली.
हे निमतान कोंकणी अध्ययन फांट्यान युवा कोंकणी कथाकारांच्या कथा झेल्यांचें लोकार्पण जालें, तशेंच संपदा सवासे हांचो ‘अमुल्य देणें’ हो कथा झेलो उजवाडाक हाडलो.
हेमा नायक हांणी सांगलें, आमी विश्वव्यापी जाल्यात. इंटरनॅट वरवीं रचना संवसारभर पावपाक लागल्यात आनी हेर भाशांतल्यान अणकार जावपाक लागल्यात. हातूंत लेखकांक वेगळेंपण राखपाचें आसल्यार आपली नदर विस्तृत दवरची पडटली. 50 वर्सांच्या काळांत चलत, धेपां मारीत कोंकणीच्या मळार इतली उदरगत जाली. आमच्या काळा वयल्या कथाकारांक तेन्ना मानाचीं पदां मेळूंक नात. तांचीं पुस्तकां अजून उपलब्ध आसात. तांचें मार्गदर्शन आमकां घेवपाक मेळटलें. कोंकणी वांगडाच आमकां हेर अणकारीत साहित्य वाचपाक जाय, तेन्नाच आमकां खरी परिस्थिती कळटली, अशें तांणी सांगलें.
ह्या दोन दिसांच्या संमेलनांत खूब कितें शिकपाक मेळटलें. पूण ही स्थिती आमच्या वेळार नाशिल्ली. फकत परिशद आनी संमेलनां आयकून आमी शिकतालीं. कार्यशाळा खुबूच उण्यो आसताल्यो. ह्या कथा महोत्सवांत नवे पिळगेक खूब मार्गदर्शन मेळटलें. आमचो काळ वेगळो आसलो. आमी कथा कशी बरोवची ती शिकली नात. तुमकां नांव घडोवपाचें आसा आनी आयच्या डिजिटल युगांत वेगळेंपण आनी दर्जो दवरपाचो यत्न करपाक जाय, असो उलो नायक हांणी मारलो.
आपलें साहित्य कोंकणी पुरतें मर्यादीत दवरिनासतना तें अणकारीत करून भारतभर पावयात, असो उलो डॉ. प्रकाश पर्येंकार हांणी मारलो. कोंकणींत कथांची संख्या उणी आसा. अशे तरेची कथा बरयतना तांचो दुसरे भाशेंत अणकार जावप गरजेचो आसा. फकत कोंकणी वाचकां मेरेन मर्यादीत रावनासतना आपलें साहित्य पुराय भारतभर अणकारीत जावन पावतले हे खातीर यत्न करात. फकत कोंकणीच न्हय भायल्या राज्यांतल्या वाचकांनी तुमची तोखणाय करून कोंकणीचो प्रवास गोंया भायर जावपाक जाय, अशें डॉ. पर्येकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.