भांगरभूंय | प्रतिनिधी
कॉलेजांतल्यान रेस्टिकेट केल्ल्या एकाद्र्या विद्यार्थ्यान घरा येवृन
आपल्या पालकां कडेन तावातावान आपली बाजू मांडटना
कॉलेजाच्या प्राचार्याच्या नांवान बोटां मोडप आनी आपल्याक भियेवन प्राचार्यान हो निर्णय घेतला अशें सांगप अशेच तरेचें भुरग्या भशेन विधान राहुल गांधी हाणें हालींच ताका लोकसभेचो वांगडी म्हणून अपात्र थारायल्या उपरांत थयथयाट करतना केलें. तशें पळोवपाक गेल्यार सुरतांतल्या एक कनिश्ठ न्यायालयान राहुलाक दोन वर्सांची ख्यास्त फर्मायली आनी ताची खासदारकी संविधानांतले तजविजी प्रमाण आपशीच रद्द थारली. ही वस्तुस्थिती आसतना मोदी सरकारान लोकसभेंतल्यान आपल्याक हद्दपार केल्ल्याची भूमिका घेवन ताणें थयथयाट केलोच, तशेंच आपूण लोकसभेंत जें भाशण करपाचो आशिल्लों ताका भियेवन प्रधानमंत्री नरेंद्र मोदी हांणी आपलो कांटो काडला अशें भुरगेपणाचें विधान केलें, ताचें समर्थन कोणूय करचो ना. आतां राहुल गांधी हाका खासदार म्हणून अपात्र थारोवपाच्या निर्णया कडेन सरकाराचो पयसुल्ल्यान लेगीत संबंद नाशिल्लो अशें छातीठोकपान म्हणप धाडसाचें थारतलें, पूण न्यायालयाच्या निवाड्या उपरांत तो निर्णय जाल्ल्यान तसो दावो करप म्हणल्यार न्यायालयाच्या निर्णयांत सरकाराचो हस्तक्षेप आशिल्ल्याचो आरोप करपा सारकोच आसा. न्यायालयान त्याच सुमाराक दिल्लो निवाडो घडये फकत योगायोग आसतलो अशेंय ताचेर म्हणपाक येतलें, पूण न्यायालयाचो निवाडो त्या वेळार येवंक नाशिल्लो जाल्यार राहुल गांधी हांची खासदारकी वाटावली आसतली असोय निश्कर्श कोणी काडचो अशीय परिस्थिती नाशिल्ली. कारण ताका अपात्र थारावपाचो निर्णय पयलींच जाल्लो अशें समजपाकूय बरोच जागो आसा. विदेशांत राहुल गांधी हांणी भारतीय लोकशायेच्या विरोधांत केल्लीं वक्तव्यां तशेंच बरींच आक्षेप घेवपा सारकी विधानां, हाका लागून ताणें सभाघरांत बिनशर्त माफी मागची हे मागणे वयल्यान सत्तारूढ पक्षाच्या वांगड्यांनीच सभाघरांत बोवाळ घाल्लो आनी केन्नाच नाशिल्लो असो पेंच सरकारा सामकार तयार जाल्लो.
सरकाराक ह्या पेचप्रसंगातल्यान सुटका करून घेवपाची आशिल्ली. राहुल गांधीन माफी मागूंक नाशिल्ल्यान त्याच आधारान ताका अपात्र थारायतले हें सामकें थारिल्लें. मात ताका लागून ताका चड सहानुभूती मेळपाचो धोको आशिल्लो हें मतींत दवरून ताका अपात्र थारावपाच्या निर्णयाचो सांगोड सूरतांतल्या न्यायालयान दिल्ल्या निवाड्या कडेन घालून सरकारान ह्या निर्णयांतल्यान आपले हात फाटीं घेवपाचो जरी यन्त केलो आसलो तरी ताका लागून राहुल गांधी आनी काँग्रेस पक्षाचेर एक तरेन राजकी झूज लादलें असो निश्कर्श कोणेय काडचो. राहुल गांधी आनी ताच्या काँग्रेस पक्षाची आनी भाजपाची लुटुपुटूची लडाय तशी बरोच तेंप चालू आसा आनी काँग्रेसाक ताका लागून तकली वयर काडपाची संद अभावानूच मेळ्ळी. राहुल हाका अपात्र थारायल्ल्यान काँग्रेस पक्ष आतां ताचे कडेन एक म्हाझूज म्हणून पळोवपाक लागला. भाजपा खातीर तांणी काँग्रेसाचेर लादल्लें राजकी म्हाझूज कितलें मेरेन फायदेशीर थारता हें कांय दिसांनी दिसून येतलेंच, पूण ताच्या वांगडा देशांत स- सात राज्यांत जावपाच्या आशिल्ल्या विधाानसभा वेंचणुको आनी वर्स भरयां जावपाचे आशिल्ल्या लोकसभा वेंचणुकेचे फाटभुंयेर भाजपान लादल्लें हें म्हाझूज काँग्रेसाक पेलतलें काय, होच खरो प्रश्न आसा.
‘मोदी आड गांधी’ अशीच थेट मॅच जावप हें भाजपा खातीर हिताचें आसतलें असो निश्कर्श काडून जर भाजपान हें म्हाझूज काँग्रेसाचेर लादलें जाल्यार काँग्रेस पक्षा खातीर येता ते वेंचणुकेंत ‘करात ना जाल्यार मरात’ ह्याच निर्धारान रणांगणाचेर देंवचें पडटलें. भाजपान दिल्ल्या संदीचें भांगर करपाचें आसल्यार काँग्रेसाक फुडलें वर्सभर रातीचो दीस करून लोकां मदीं वच्चें पडटलें, पूण प्रश्न असो आसा की काँग्रेसच्या सध्याचे ‘तोळामासा प्रकृती’क हे म्हाझूज झेपतलें काय? सध्याचे घडयेक तरी ह्या प्रश्नाची जाप न्हयकारार्थीच आसा आनी ते खातीर जायतीं कारणांय आसात.
भाजपाची एकूण रणनिती स्पश्ट दिसून येता आसतना काँग्रेस पक्षानूय फाटल्या दोन दिसांत भाजपा कडेन दोन हात करपाक आमी तयार आसात हें दाखोवन दिलां, तरी हीच उमेद फुडल्या वर्सभर तिगतली हाची गवाय दिवपाक जायना. राहुलाक अपात्र थारायल्या उपरांत न्यायालयीन लड्याक प्राधान्य दिवपाचे सुवातेर काँग्रेसान राजकी आघाडेर भाजपाक ना नपयत करपा खातीर विडो उखल्ल्याचें चड दिसता. भाजपा खातीर घडये तें अपेक्षीत नासत, मात गांठ निमणे भाजपा कडेन आसा हाचो विचार करून काँग्रेशीक पावलां घालचीं पडटलीं. अपात्र थारायल्ल्यान राहुल गांधी खातीर सगळेच वैफल्गग्रस्त विरोधी पक्ष फुडारी सहानुभूती व्यक्त करतना दिसतात तरी हे परिस्थितींतूच काँग्रेशी कडेन म्हा- आघाडीचें फुडारपण दिवपाक चडशे जाण उत्सूक नात आनी हाचें एकसुरें कारण अशें की काँग्रेसच्या फाटल्यान रावल्यार तांकां तातूंत धोकोच चड दिसता.
राहुल गांधी लडपाची भास चड तळमळीन करता तरी तांची कांय बालीश विधानां जायत्या जाणांक पचनात आनी तातूंतल्यान वेगळ्याच्या समस्यांक आपूण आमंत्रण दिता हाचें भान लेगीत ताका आसना. माफी मागपाक आपूण सावरकार न्हय जाल्यार हांव राहुल गांधी आसा हें विधान करतना महाराष्ट्रांत आपूण आपल्या वांगडा आपल्या इश्ट पक्षांकूय अडचणींत हाडटां हाचें भान ताणें दवरलें ना. राहुल गांधीन आपूण माफी मागचो ना हें सांगून ताणे स्वताचेर अपात्रतायेचें संकश्ट ओडून घेतलें पूण तेच वांगडा हाचे पयलीं माफी मागून आपणे सुटका करून घेतल्या हाचें भान ताणे बालिश विधानां करतना दवरिल्लें जाल्यार ताचे खातीर तें बरें पडपाचें.
राहुल गांधी हाका न्यायालयीन लड्यांत हाचे फुडें घडये थाकाय मेळतूय पूण ताका अपात्र केल्ल्यान आयज मेळपी सहानुभूती ताका निमणे मेरेन मेळटली ह्या भ्रमांत काँग्रेस रावलो जाल्यार तांच्या पदरांत निर्शेणीच पडपाची चड शक्यताय आसा. राहुल गांधीचें अपरिपक्व नेतृत्व स्विकारपाक सध्या कोणूय तयार आसात, अशें दिसना. अपात्रायेचो पट्टो गळ्यांत पडल्या उपरांत आम आदमी पसून समाजवादी आनी तृणमुल काँग्रेस मेरेन सगल्यांनीच भाजप आनी नरेंद्र मोदी हांचेच तोंणसुख घेवपाची संध सादली, पूण व्हो प्रकार म्हणल्यार दोळ्यांक उदक लावपा सारको आशिल्लो. अरविंद केजरीवाल, ममता बॅनर्जी, अखिलेश यादव ही मंडळी काँग्रेसा वांगडा मैदानांत देंवून म्हाझूजांत तांका वांगडो दितली ही अपेक्षाच ताका लागून कोणाकूय करपाक जावची ना. दरेका खातीर आपली जायदाद म्हत्वाची आसा. अशे परिस्थितींत काँग्रेसाक तांचेर लादल्ले राजकी म्हाजूज निमणे एकट्यानूच लडचें पडटलें आनी आशिल्ल्यो नाशिल्ल्या तीन- चार फुडाऱ्यांक घेवन लडप जाल्यार सामकेंच कुस्तार आसा. न्यायालयीन आनी राजकी अश्या दोन रणांगणाचेर काँग्रेसाक हे झूज लडचें पडटलें.
फाटल्या दोन दिसांतल्या संकल्प सत्त्याग्रहाक राज्यां राज्यांत मेळल्लो प्रतिसाद उमेद वाडोवपी आशिल्लो तरी तो कायम तिगोवन दवोरप तितलें सोपें न्हय. प्रियांका वाड्रा हिचो चेरो फुडें येतलो काय हें लेगीत पळोवचें पडटलें. राहुल गांधीची ढाल करून म्हाझूजाक सामकार वतना नवे राष्ट्रीय अध्यक्ष मल्लिकार्जुन खर्गे हांचीय कसवटी लागतली. सध्याचे घडयेक तरी काँग्रेसा खातीर ‘दिल्ली तो बहुत दूर है ‘ अशेंच म्हणपाक जाता.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
