भांगरभूंय | प्रतिनिधी
अभूतपूर्व, अनाकलनीय, अविश्वसनीय ह्या तीन उतरांनी पंदराव्या विधानसभेच्या निकालाचें वर्णन करचें पडटलें. अभूतपूर्व म्हणल्यार हाचे पयलीं केन्नाच घडलें ना अशें. हो निकाल अभूतपूर्व असोच आसा. कारण हाचें पयलीं असो निकाल महाराष्ट्रान केन्नाच पळोवंक नाशिल्लो. 2014 च्या मोदी ल्हारांतूय जें घडूंक नाशिल्लें तें आतां घडलें. महायुतीन सुमार दोनशे छत्तीस सुवातो जिखून महाविकास आघाडीक मातयेभरवण केली. महाराष्ट्रांत महायुतीचें ल्हार न्हय जाल्यार त्सुनामी आयली. ह्या त्सुनामीत महाविकास आघाडीचे खूबशे गड उध्वस्त जाले. महाविकास आघाडीच्या खूबशा दिग्गज फुडाऱ्यांक हार घेवची पडली. ही त्सुनामी इतली जबरदस्त आशिल्ली की पांच म्हयन्यां पयलीं जी महाविकास आघाडी अजिंक्य अशी दिसतली ती अर्दशेंकड्या लागीं लेगीत पावली ना. महाराष्ट्राच्या इतिहासांत पयलेच फावटी विधानसभेक विरोधी पक्ष फुडारी लंगीत मेळचो ना अशी अवस्था जाल्या. हे खरेंच अभूतपूर्व अशेंच आसा.
अनाकलनीय ह्या अर्थान असो निकाल लागत असो अदमास कोणाकूच येवंक नाशिल्लो. महाराष्ट्रांतलोच न्हय जाल्यार देशभरांतल्या राजकी तज्ञांक लेगीत असो निकाल लागतलो अशें दिसूंक नाशिल्लें. स्वता भाजप आनी महायुतीच्या फुडाऱ्यांक लेगीत अशें जैत अपेक्षीत नाशिल्लें. खूबशा जाणांक विचार आनी अभ्यास करपाक लावपी असो हो निकाल आसा. महायुतीक हे वेंचणुकेंत महाविकास आघाडी परस थोड्योभोव सुवातो चड मेळटल्यो असोच अदमास आशिल्लो. महायुती कशी तरी सत्तेचीं सोंपणां चडत असो अदमास आशिल्लो. वेंचणुके पयलीं हेंच दाखयिल्लें. पूण प्रत्यक्षांत ताचे परसूय खूब वेगळें घडलें.
अविस्वनीय ह्या अर्थान की, ह्या निकलाचेर विस्वास दवरप खूबशा जाणांक अजून लेगीत कठीण वता. कांय जाण ह्या निकलाचेर अजून लेगीत विस्वास दवरपाक तयार नात. कारण फक्त पांच म्हयन्यां पयलीं जाल्ले लोकसभा वेंचणुकेंत पुरायपणान वेगळें चित्र पळोवंक मेळिल्लें. महाविकास आघाडीन अजापीत करपी कामगिरयी करून लोकसभेच्यो 39 सुवातो जिखून महायुतीक घाम काडिल्लो. फक्त पांच म्हयन्यांत अशी कसली जादवाची बडी घुंवली की जाणे येदो व्हड चमत्कार केलो? लोकसभे प्रमाणूच विधानसभेंतूय महाविकास आघाडीक जैत मेळुये असो कांय जाण अदमास बांदताले. ते खातिरूच ह्या निकलाचेर तांचो विस्वास बसना. अर्थांत कोणाचो विस्वास बसूं वा ना बसूं लोकांनी दिल्लो हो निकाल राजकी पक्षां सयत सगल्यांक स्विकारचोच पडटलो. हो लोकांच्या न्यायालयान दिल्लो निकाल आसा. तो स्विकारुनच विरोधी पक्षांनी ह्या निकालाचें आत्मचिंतन करूंक जाय.
ह्या निकालाचें अवलोकन करीत जाल्यार अशें दिसून येता की लोकसभा वेंचणुकेंत जाल्ले चुकी उपरांत महायुतीन त्यो निकालाचें आत्मपरिक्षण करून चुकी आनी उणिवो पयस करपाचो प्रामाणीक यत्न केलो. भाजप, शिंदें हांची शिवसेना आनी अजीत पवारांचे राष्ट्रवादीन सामुहीक यत्न केलो ताका राष्ट्रीय स्वयंसेवक संघाचो सदचे प्रमाण सांगात मेळ्ळो. लोकसभेचे वेंचणुके उपरांत भाजपाच्या दिल्लींतल्या फुडाऱ्यांनी ल्हान व्हड कार्यकर्त्यांच्यो बसका घेवन प्रचाराचें बरे तरेन सूक्ष्म आनी खरपणान नियोजन केलें. हाचें उरफाटें महाविकास आघाडी लोकसभेच्या येसान भुल्लसून गेली. लोकसभे प्रमाणूच विधानसभेंतूय आमकां सहानुभीती मेळटली ह्या भ्रमांत महाविकास आघाडीचे फुडारी रावले. हाका लागून तांचे मदीं कसलोच समन्वय नाशिल्लो. सुवात वांटपा वेल्यान वा प्रचारसभे वेळार महाविकास आघाडीचो एवकट खंयच दिसून आयलो ना. महाविकास आघाडीचे फुडारी सत्ता आपल्याक मेळटली ह्या थाटांत एकामेकां कडेन झगडूंक लागले. मुख्यमंत्रीपदा वेल्यान महाविकास आघाडींत रस्सीखेच सुरू जाली. महाविकास आघाडींतल्या बाश्कळ फुडार्यांनी जी बोल बच्चनगिरी केली ती तांकां म्हारग पडली.
लोकसभा वेंचणुकेंत फाटीं पडले उपरांत महायुती खडबडून जागी जाली आनी महायुती सरकारान खूबशो लोकाभिमूख येवजण्यो हाडल्यो. ‘मुख्यमंत्री लाडकी बहीण’ येवजण ही एक तातूंतलीच येवजण. हे येवजणे खाला 1500 रुपया बायलांच्या खात्यांत जमा जावंक लागले. ही येवजण महायुती खातीर गेम चेंजर थारतली असो अदमास आशिल्लो तो खरो थारलो. ह्या वेळार बायलां मतदार व्हड प्रमाणांत घरा भायर सरून मतदान केलें. बायलां मतदारांची टक्केवारी पांच टक्क्यांनी वाडली. राज्यांतल्या लाडक्या बहिणांनी महायुतीचे व्हंटयेंत भरभरून मतांचे दान घालें. घडये हाका लागून महायुतीक इतलें विराट जैत मेळोवपाक येस आयलें. ज्या वेळार ही येवजण आयली त्या वेळार विरोधी पक्षांनी हे येवजणेचेर टिका केली. ही टिका घडये बायलां मतदारांक रुचली नासुये. राज्यांतल्या बायलां मतदारांनी महायुतीक सांबाळ्ळेंच ना जाल्यार अक्षरशा उबारून धरतली होचो विस्वासूच कोणाक बसचो ना आनी हाकाच लागून महायुतीक मेळिल्लें हें घसघशीत येस.
ह्या निकालान काँग्रेस, शरद पवारांची राष्ट्रवादी काँग्रेस आनी उद्धव ठाकरेंच्या शिवसेनेच्या अस्तित्वाचो प्रस्न निर्माण जाला. ह्या तिनूय पक्षांक मतदारांनी न्हयकारून भाजप, एकनाथ शिंदे आनी अजीत पवार हांचेर विस्वास दाखयला. ताका लागून ह्या तिनूय पक्षांक आतां परतून शुन्यांतल्यान सुरवात करची पडटली. अर्थांत एका हारीन खंयचोच पक्ष सोंपना. जाल्ल्यो चुकी दुरुस्त करून ह्या पक्षांनी 2029 चे लक्ष मुखार दवरूनच पक्षाची बांदणी कची पडटली. पक्षांतल्या पोरण्या बोल बच्चन फुडाऱ्यांक कुशीक दवरून नव्या दमाचे कार्यकर्ते तयार करचे पडटले. फुडारांत थळाव्या स्वराज्य संस्थांच्यो वेंचणुको आसात ताचेर लक्ष केंद्रीत करून ह्या पक्षांनी तयारी सुरू करची. लोकांक दिल्लीं आस्वासनां पुराय करून महाराष्ट्राक देशांतलें नंबर 1 चें राज्य घडोवपा खातीर यत्न करचे.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
