भांगरभूंय | प्रतिनिधी
सरपंच डॉ. गांवकार : मुख्यमंत्री, पंचायत संचालकाक कळयलां
भांगरभूंय । प्रतिनिधी
दिवचल : पंचायत सचीव आदार करिना हो मुद्दो लाटंबार्से पंचायत ग्रामसभेंत उपस्थीत जालो. स्वता सरपंच डॉ. रामा गांवकार हांणी गांवच्या लोकां वांगडाय नाराजीचो सूर उक्तायलो. ग्रामसभे उपरांत उलयतना सरपंचान सांगलें, सचिवाचो मुद्दो मुख्यमंत्री तशेंच पंचायत संचालकाक लेखी स्वरुपांत दिलां. लोकांचीं कामां आडावचीं न्हय ही आमची भुमिका आसा.
पंचायत कार्यालयांत आयोजीत केल्ले ग्रामसभेंत सचिवा विशां मुद्दो उपस्थीत केलो. हाचेर लोकां सयत सगळ्या पंचायत मंडळान नाराजी उक्तायली. ह्या वेळार खूबश्या लोकांनी विवीध विशयांचेर भुमिका मांडल्यो.
बेकायदो प्लॉट प्रकरणांत कारवाय करपा संबंदांतलो प्रस्न उपस्थीत जालो तेन्ना पंचायत योग्य निर्णय घेवन कारवाय करतली, अशी हमी सरपंचान दिली. पंचायत वाठारांतले विवीध विशयांचेर हाजीर आशिल्ल्या लोकांनी मुद्दे उपस्थीत केले. हेडग्यां गोरवांचो विशय, उदरगतीच्यो येवजण्यो तशेंच हेर विशय चर्चेक आयले. पंच वांगड्यांनी आपल्यो भुमिका मांडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
