भांगरभूंय | प्रतिनिधी
दिवचल: लाटंबारसे पंचायतीचे सरपंच पद्माकर मळीक हांचे आड पांच पंचायत वांगड्यांनी अविस्वास थारावाची नोटीस दिल्या. ताची प्रत दिवचल गट विकास अधिकारी कचेरेंत सादर केल्ल्याची म्हायती पंच वांगड्यांनी पत्रकार परिशदेंत दिली.
ह्या अविस्वास थारावाचेर पंच वांगडी कृष्णा आरोलकार, हर्षदा परवार, दिलीप वरक, डॉ रामा गांवकार, त्रिशा राणे हांच्यो सयो आसात. पंचायतींत वट्ट णव पंच वांगडी आसात.
पत्रकार परिशदेंत म्हायती दितना पंच डॉ. रामा गांवकार हांणी सरपंच पद्माकर मळीक हांणी कबलाती प्रमाण आपलो राजिनामो निर्धारीत वेळेंत दिलो ना. ताका लागून आमी कांय दीस वाट पळयली. आतां आमी गांवच्या फुडारा खातीर एकठांय आयल्यात आनी आमचो पांच जाणांचो गट एकसंघ आसा. आमच्या गटांतल्यान म्हजी सरपंचपदार निवड जावपाची आसा अशें डॉ. रामा गांवकार हांणी स्पश्ट केलें.
आमी संघटीत रावन विकासाक चालना दितले अशेंय तांणी मुखार उलयतना म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
