भांगरभूंय | प्रतिनिधी
मॉवीन गुदिन्हो: 200 केव्हीच्या ट्रान्सफाॅर्मराच्या कामाक सुरवात
दिवचल: उद्देगीक मळार वेवसाय म्हूण गोंय हें ब्रॅण्ड म्हूण वळखतात. खूबशे व्हड उद्देग गोंयांत येवपाक इत्सूक आसात. लाटंबारशें उद्देगीक वसणुकेंत बरे उद्देग हाडून थळाव्यांक व्हड प्रमाणांत संदी मेळच्यो हे खातीर यत्न सुरू आसात. सगलीं कामां ताकतिकेन चालीक लायतना ह्या वाठाराक बरी चालना दिवपा खातीर सरकार सगले तरेचे यत्न करीत आशिल्ल्याचें उद्देग मंत्री मॉवीन गुदिन्हो हांणी सांगलें.
लाटंबारशें उद्देगीक वसणुकेंत मुळाव्या पांवड्यार 200 केव्हीच्या ट्रान्सफॉर्मराच्या कामाचो शुभारंभ केलो. ह्या वेळार उद्देगीक विकास मंडळाचे अध्यक्ष आमदार आलेक्स रेजिनाल्ड लॉरेन्स, आमदार डॉ. चंद्रकांत शेट्ये, जिल्हो पंचायत वांगडी प्रदीप रेवोडकार, विस्वास गांवकार, वीज खात्याचे कार्यकारी अभियंते मुद्रस, उद्देगीक वसणूक मंडळाचे अधिकारी, पंचायत वांगडी बी मानेस्त ह्या वेळार हाजीर आशिल्ले.
हे उद्देगीक वसणुकेंत 84 भुंयखंड आसून चार उद्देजकांनी भुंयखंड घेतल्यात. हेर उद्देजकूय येवपाक उत्सूक आसात. सगली प्रक्रिया जलद गतीन पुराय करपा खातीर सगले ते यत्न करीत आसात अशें गुदिन्होन म्हणलें.
ह्या वाठाराची उदरगत जावंक जाय. थळाव्यांक सगले ते प्राधान्य दितना अविकसीत वाठाराचो विकास सादप आमचें कर्तव्य आसा. प्रधानमंत्री नरेंद्र मोदी हांच्या मार्गदर्शना खाला गोंयांत सगले कडेन उदरगत जायत आशिल्ल्याचें तांणी मुखार उलयतना म्हणलें.
उद्देगीक विकास मंडळाचे अध्यक्ष आमदार आलेक्स रेजिनाल्ड हांणी लाटंबारशें उद्देगाक चालना दिवपा खातीर आमी फास्ट ट्रॅक यत्न करीत आसात. सुमार तीन हजार चौमि सुवात उपवीज केंद्रा खातीर निश्चीत केल्या, आनी ताकतिकेन कामां चालीक लावपाचे आदेश दिल्यात. कच्चें उदक, हेर वेवस्था आनी विजेची सुविधा दितले. ह्या वाठारांत रोजगार निर्माण करपी उद्देग उबारपाचे आमचे यत्न आसात अशें तांणी सांगलें.
आमदार डॉ. चंद्रकांत शेट्ये हांणी ह्या वाठारांत उद्देगाक चालना दितना ताकतिकेन ते सुरू करून रोजगाराच्यो संदी उपलब्ध करून दिवपाची येवजण आसा. ते खातीर मंत्री, मुख्यमंत्री आनी सगल्या घटकांचे सहकार्य मेळत आशिल्ल्याचें तांणी स्पश्ट केलें.
मानेस्तांनी नाल्ल फोडून कामाचो शुभारंभ केलो.
दिवचले डिजिटल सर्वे करतले: मॉवीन
लाटंबारशें उद्देगीक वसणुकेंत खूबशे उद्देग बंद आसात. खूबशा जाणांनी स्थलांतर केल्यात. कांय गोंया भायर वचपाचे तयारेंत आसात हे विशीं विचारलें तेन्ना मंत्री मॉवीन गुदिन्होन म्हणलें, जे उद्देग बंद आसात वा भुंयखंड तशेंच आसात ताचो डिजिटल सर्वे करून फुडलो निर्णय घेतले. एखादो युनीट चलना आसत जाल्यार थंय दुसऱ्यांक प्राधान्य दिवपाची प्रक्रियाय हातांत घेतले अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
