भांगरभूंय | प्रतिनिधी
पंधरा आॅगस्ट, 26 जानेवारी हे राष्ट्रीय दीस आयले की आमची देशभक्ती जागी जाता….. आनी प्रत्येक भारतीय नागरिकां भितर ही देश भक्ती आसपाकुच जाय. पुण ती फक्त राष्ट्रीय दीसा पुरती उरनासतना वर्साचे बाराय म्हयने काळजान आसची. फक्त राष्ट्रीय सणां दिसा सोशल मिडीयाचेर स्टेटस दवरपा पुरती ती आसपाक जायना. आमचे सदचे जिणेन ती आमी कितली जपता हो संशोधनाचो मुद्दो जावं येता.
आयज देशान जेन्ना वायट क्रुत्य घडटा, कोणाचेर अत्याचार जाता, कोण भ्रश्टाचार करता… अशे वेळार तो आमचे विचारसरणेचो आसल्यार आमी ताचेर आवाज काडीनात. दोळ्यांर पट्टी बांदून वग्गी रावतात. देश जेन्ना ब्रिटिशांच्या शेकातळा आशिल्लो त्या वेळार जाय ते क्रांतिकारी देशा खातीर लढले आनी आमचो हो भारत देश गुलामगिरीतल्यान मुक्त केलो. त्या वेळार जशे देशा खातीर लढपी क्रंतिकारी आशिल्ले तशेच ब्रिटिशांची गुलामगिरी करपी फितुरुय आशिल्ले आनी म्हणूनच ब्रिटिशांचें फावतालें.
देशांत आयजुय क्रांतिकारी आसात, जे अत्याचाराचेर आवाज उठयतात. अन्याया आड लढटात. पुण तांचो आंकडो खूब उणो आसा. तेच भाशेन जाय ते फितुरुय आसात. आयचे तरणाटे पिळगे मदीं देशभक्तीची मशाल जागोवपाची गरज आसा. जाय ते शिकिल्ले तरणाटे आयज भ्रष्टाचार हो आमचे देशान ‘काॅमन’ जाला वा ‘सगळेच खातात’ अशे म्हणटात आनी ओगी रावतात. तातूंतले कांय जाण फुडाराक नोकरेक लागले काय स्वताय खातात. देशाचे हीत पळयत जाल्यार ही व्रुत्ती खूब लुकसाण करपी. हाचो अर्थ ह्या देशान हो भ्रश्टाचार असोच चलपाचो काय, असो मनाक प्रश्न पडटा.
हो आमचो भारत देश जर खरोच म्हान जातलो जाल्यार भ्रश्टाचाराचेर, अत्याचाराचेर आमी तरणाट्यांनी आवाज काडपाक जाय. आमी स्वता ते वाटेक वचपाक जायना. संवसारान जाय ते लोग गुलाम कशे वागतात. घडये तांचो तो सुवार्थ आसु येता. पुण आमचो देश म्हासत्ता करतलो जाल्यार, आमकां खास करुन राजकी मनशाची गुलामगिरी, लाचारी सोडची पडटली. आमी भारतीय स्वावलंबी, स्वतंत्र आसात, हें जगाक दाखोवन दिवचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
