भांगरभूंय | प्रतिनिधी
पणजी: मनीसबळ सेवा पुरोवपी कंपनीचे प्रलंबीत बील दिवपा खातीर लांच मागिल्ल्या प्रकरणांत केंद्रीय गुन्यांव अन्वेशण फांट्यान (सीबीआय) आयकर खात्याच्या लेखा विभागांत सेवा दिवपी सीएजीचे (कंट्रोलर ऑफ अकावंट जनरल) अधिकारी पंकज कुमार आनी अतूल वाणी ह्या दोगांक रंगेहात धरिल्ले. त्या दोगांकूय पणजेंतल्या उत्तर गोंय जिल्हो आनी सत्र न्यायालयान सशर्त जामीन मंजूर केलाे.
ह्या प्रकरणांत राज एटंरप्रायजेस कंपनीच्या धनी कमलाकांत चतुर्वेदी हांणी सीबीआय कडेन ह्या लांच प्रकरणा विशीं बुधवारा 13 वेर कागाळ दाखल केल्ली. कंपनीचे सात म्हयन्यांचें बील हातावेगळें करपा खातीर दुबावीत पंकज कुमार हाणें दोन लाख रुपयांची लांच मागिल्ल्याचें कागाळेंत म्हणिल्लें. ते प्रमाण सीबीआयन गुन्यांव दाखल करून चवकशी सुरू केली.
ह्याच वेळार दुबावितांनी लांचेची रक्कम दिवपा खातीर 14 वेर पाटो-पणजे सेंट्रल लायब्ररी कुशीक दुबावितांचे मोटारीचेर धाड घालून दोगांय दुबावितांक 1 लाख रुपयांची लांच घेतना रंगेहात धरले. उपरांत त्या दोगांकूय सीबीआयन अटक केली.
उपरांत न्यायालयान पंकज कुमार आनी अतूल वाणी ह्या दोगांकूय सीबीआयची कोठी दिली. ह्याच वेळार त्या दोगांनीय पणजेंतल्या उत्तर गोंय जिल्हो आनी सत्र न्यायालयांत जामीन अर्ज दाखल केलो. ह्या प्रकरणांत न्यायालयान दोगांकूय सशर्त जामीन मंजूर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
