भांगरभूंय | प्रतिनिधी
सध्या झुजाच्यो गजाली सगले कडेन चालू आसात. पाकिस्तानाचो चड त्रास जावपाक शकता तो पंजाब, हरियाणाक. काश्मीराक तो फाटलीं 75 वर्सां जाताच. मुखेल गजाल म्हणल्यार आमचे भारतीय तरणाटे लश्करांत भरती जावपाक फाटीं फुडें जातात. सोशल मिडियाचेर पाकिस्तान आनी हेर लोकांचेर घणाघाती म्हणटात तशी टिका करपी तरणाटे तर घडये सगल्यांत फाटीं आसतले! कांय राज्यांनी तर आख्खो गांवूंच लश्करांत भरती जाल्ल्याचीं उदाहरणां आसात.
पाकिस्तानाचेर हल्लो करपांत हवाई दळान बरी कामगिरी केल्या. म्हायती मेळटा ते प्रमाण, दोन अस्तुरी विमान चलयताल्यो. तांणी पाकिस्तानांत वचून हल्लो केलो. तातूंतले एके अस्तुरेचो घोव आतंकवाद्यांच्या हल्ल्यांत शहीद जालो. तिचें हालींच लग्न जाल्लें. ते स्थितींत ती कामार आयली आनी तिणें पराक्रम केलो. भारतीय तरणाट्यांनी (हातूंत गोंयूय आयलें) लश्करांत वचपाचो निर्णय घेवपाक जाय. जर तुमी ते बाबतींत गुणेस्त आसात, जाल्यार तुमची निवड जावप कठीण न्हय. तुमी नोकरेचे बाबतींत वायट गजाली आयकल्या आसतल्यो. मात लश्करांत असलें कितें घडप कठीण.
लश्कराची वेबसायट आसा. ताका लागून तुमी पात्र आसात, काय नात तें कळप सोंपे जाता. लश्कराक तरणाटें रक्त जाय आसता. ताका लागून ते दरवर्सा भरती करीत आसतात. कांय वर्सा सेवा केली काय तुमी व्हीआरएस घेवपाक शकतात. सगल्याच पदांचेर काम करपी लोकांक झुजा भुंयेर वचून लढचें पडना. कांय लोकांनी पातळायिल्लो हो गैरसमज. ताका लागून लश्कर म्हणजे मरण अशें लोक मानपाक लागल्यात. जर तुमचें शिकप चड आसा जाल्यार तुमी उंचेल्या पदाक अर्ज करूं शकता. इंग्लिशींत सामान्य गिन्यान, आंकडे वळखप, लश्करी अॅप्टिट्यूड टेस्ट, रिझनिंग अशे विशय आसतात. ताची तुमी आदींच तयारी करपाक शकतात. हाची सगली म्हायती आयच्या काळांत वेबसायटीचेर मेळटा. हे सेवेंतल्यान तुमकां प्रत्यक्ष देशसेवा करपाक मेळटा. गणभेस घालपाक मेळटा. समाजात मान मेळटा. आमचो राष्ट्रप्रेमी समाज जवानाक देवा समान मान दिता. हाचो अणभव तुमकां नोकरेक लागतकच रोखडोच मेळटलो.
तुमी हायस्कूल, काॅलेजींत आसतना शिस्त, राष्ट्रभक्ती म्हणल्यार कितें तें तुमकां कळटलें. लश्कराचे तिनूय फांट्यांची वळख करुन घेवया. आयज बीएएसएफ म्हणल्यार बोर्ड सेक्युरिटी फोर्साची वळख करून दितां. ताची सुरवात भारत- पाकिस्तान झुजाचे फाटभुंयेर 1965 वर्सां जाली. शीम राखप ही व्हड जापसालदारकी तांचेर आसता. घर मंत्रालाच्या फुडारपणा खाला बीएसएफ येता. सध्या पाकिस्तान आनी बांगलादेशाची शीम राखतात. शांतीकाये खातीरुय बीएसएफ काम करता. आकांतवाद, बंडखोरी, आपत्ती वेवस्थापन लेगीत ते करतात. संवसारांतलें हें सगल्यांत व्हडलें दळ. 2,57,363 इतले जवान तातूंत आसात. तांचें मुख्यालय दिल्लींत. पयलीं तांच्यो 25 बटालियन आशिल्ल्यो, आतां ही संख्या 193 चेर पावल्या. के ए रुस्तमजी हे तांचे मुखेली.
रोजगार समाचार वाचल्यार भितर विमान दळाचीय म्हायती आसा. एअर फोर्सांत बारावी सावन पदव्युत्तर मेरेनच्या उमेदवारांक संद मेळटा. फ्लायिंग स्केवड तांत्रिक, अतांत्रिक फाटो. तुमी जायरात नाजाल्यार वेबसायट पळयात. म्हायती आशिल्ल्याक विचारात आनी फुडलें पावल घालात. तीच गजाल नौदळाची. बांबोळे लश्कराचें कार्यालय आसा, थंय लेगीत तुमी चवकशी करपाक शकतात. तशेंच तुमी दोतोरकी शिकपाक लश्करांत वचूं शकतात. तांचे खातीर तांचें वैजकी काॅलेज आसा.
हालींच केंद्र सरकारान अग्नीवीर नांवाचो सोबीत येवजण तरणाट्यां खातीर मुखार हाडिल्ली. तिचो लेगीत तुमी विचार करूंक शकता. एका अधिकाऱ्यान सांगलें, गोंयांत उमेदवारांची संख्या चड नाशिल्ल्यान आमकां ही भरती कोल्हापूरा व्हरची पडली. अशें परत जावचें न्हय. कारण एके कडेन आमी बेकार म्हूण रडटात, दुसरे वटेन आमचे मदले कांय जाण सोशल मिडियाचेर व्हड राष्ट्रप्रेम दाखयतात. गोंयकारांनी लश्कराच्या विविध फांट्यांनी वचपाचेर जरूर विचार करचो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
