भांगरभूंय | प्रतिनिधी
पणजीः लव्ह जिहाद हो सामको विकृत प्रकार गोंयांत रुजपाक लागला. आमकां खंयच्याच धर्माचो मात पसून तिरस्कार ना, पूण दरेकल्यान आपल्या धर्माक मान दिवचो. दुसऱ्या धर्मा आड कट करपाची, पद्दतशीरपणान दुसऱ्या धर्मांतल्या चलयांक फटोवप, त्रास दिवप आनी जिवेशीं मारपाची कृती आसत जाल्यार हांव ताचो खर निशेध करतां. गोंयांत अशी घडणूक घडची न्हय हे खातीर लव्ह जिहादा आडचे जागृताय मोहिमेक आमी तेंको दितात अशें समाजकल्याण मंत्री सुभाष फळदेसाय हांणी सांगलें.
हिंदू जनजागृती समितीचो ‘रणरागिणी’ फांटो राज्यांतल्या मंत्री आनी आमदारांक मेळून गोंयांत लव्ह जिहाद आड बेगोबेग कायदो तयार करपाची मागणी करता. हे फाटभूंयेर हिंदू जनजागृती समितीच्या ‘रणरागिणी’ फांट्या वतीन निवेदन दिले उपरांत सुभाष फळदेसाय हांणी हें विधान केलें. ह्या संदर्भार हिंदू जनजागृती समितीच्या शिश्टमंडळांत ‘रणरागिणी’ ची शैला देसाय, सुभाष खराडे, लक्ष्मण केरकार आनी हिंदू जनजागृती समितीचे गोविंद लोलयेकार हांचो आस्पाव आशिल्लो.
हिंदू जनजागृति समितीन हाचे आदीं खेळां मंत्री रमेश तवडकार, पर्यटन मंत्री रोहन खंवटे, नावेलीचे आमदार उल्हास तुयेकार आनी मयेचे आमदार प्रेमेंद्र शेट हांकां गोंयांत लव्ह जिहाद विरोधी कायदो करपाची मागणी करपी निवेदन सादर केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
