भांगरभूंय | प्रतिनिधी
पॅरीस ऑलिम्पिकांत काल भारताची बॉक्सर लव्हलिना बोर्गेहेन हिणें क्वॉर्टरफायनलींत सुवात मेळयली. तिणें 75 कील वजन गटांतल्या रावण्ड 16त नॉर्वेची सुनिव्हा हॉफस्टेड हिका 5-0 अशा फरकान हारयली.
नॉर्वेजीयन बॉक्सरान सुरवाती सावन आक्रमक भुमिका घेतिल्ली. पूण, लव्हलिनान तिचें दरेक आक्रमण परतावन लायलें आनी अचूक कावण्डर मुठी मारून जैत जोडलें.
क्वॉर्टरफायनलींत लव्हलिना संवसारीक क्रमवारींत पयले सुवातेर आशिल्ली चीनाची ली कियान हिच्या आड खेळटली. चीनाची बॉक्सर ली कियान हिणें दोन खेपे ऑलिम्पीक पदक जैतिवंत आसा. तिणें आशियायी खेळां सर्तींत बायलांच्या 75 कील वजन गटाचे फायनलींत लव्हलिनाक हारयिल्ली. ते हारीचो बदलो घेवपाची संद लव्हलिना कडेन आसा.
लव्हलिनान टोकियो ऑलिम्पिकांत कांश्या पदक जिखिल्लें. पूण, त्या वेळार तिणें 69 कील वजन गटांत वांटो घेतिल्लो. पॅरीस ऑलिम्पिकांत तिच्या वजन गटांत बदल जाला.
लव्हलिना सध्या संवसारीक क्रमवारींत चवथे सुवातेर आसा. झेक प्रजासत्ताकांत हालींच जाल्ले ग्रां प्रिक्स 2024त रुप्या पदक जिखलां.
मजगतीं, बॅडमिंटन खेळांत भारताची पी व्ही सिंधू आनी लक्ष्य सेन हांणी वळेरेन बायलांच्या आनी दादल्यांच्या एकोड्या गटांत जैत मेळोवन फुडले फेरयेंत सुवात मेळयली.
दोन खेपेची पदक जैतिवंत सिंधू हिणें सेगीत दुसरी मॅच जिखून निमाण्या 16त सुवात मेळयली. तिणें अॅस्टोनियाची क्रिस्तीन कुवुबा हिका 21-5 आनी 21-10 अशा सरळ गेमींनी हारयली. मॅच फकत 34 मिनटां मेरेन चल्ली.
दादल्यांच्या गटांत लक्ष्य सेनान संवसारीक क्रमवारींत तिसरे सुवातेर आशिल्ल्या इंडोनेशियाच्या जोनाथन क्रिस्तीचें आव्हान 21-18 आनी 21-12 अशा सरळ गेमींनी सोंपयलें.
श्रीजा अकुला टेबल टॅनिसांत पर्जळ्ळी
भारताची 26 वर्सां पिरायेची टेबल टॅनीस खेळगडी श्रीजा अकुला पर्जळ्ळी. तिणें सिंगापूराची जियान झेंग हिका स गेमींनी हारयली. पयली गेम हारल्या उपरांत श्रीजान जबरदस्त पुनरागमन केलें आनी 4-2 फरकान जैत जोडलें. ह्या जैतान ती उपउपांत्यपुर्व फेरयेंत पावली.
ऑलिम्पिकांत टेबल टॅनिसाचे उपउपांत्यपुर्व फेरयेंत पावपी ती भारताची दुसरी खेळगडी थारली. हाचे पयलीं मनिका बत्रान उपउपांत्यपुर्व फेरयेंत सुवात मेळयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
