भांगरभूंय | प्रतिनिधी
पणजी : कॅब चालकान केल्ल्या मारपेटा उपरांत शेनवारा बेळगांवां (कर्नाटक) मरण आयिल्ले आदले आमदार लवू मामलेदार हांचे कुडीचेर आयतारा फोंडेंचे मसुंडेंत निमाणे संस्कार केले. राजकी फुडाऱ्यां सयत विवीध मळा वयल्या मानेस्तांनी मामलेदार हांचे कुडीचें दर्शन घेतलें.
खाजगी कामा निमतान बेळगांवां गेल्ले लवू मामलेदार खडेबाजार-बेळगांवच्या शिवानंद लॉजांत राविल्ले. शेनवारा दनपाराच्या सुमाराक प्रवास करतना तांचे मोटारीचो धपको मुखार आशिल्ल्या कॅबाक बसलो. तातूंत कॅबाचें व्हडलेशें लुकसाण जावंक नाशिल्लें. ताका लागून मामलेदार हांणी माफी मागून लॉजाची वाट धरली. पूण संबंदीत कॅब चालकान मात ताचो फाटलाल केलो. मामलेदार शिवानंद लॉजाच्या पार्कींग वाठारांत मोटार पार्क करताले तेन्ना कॅब चालकान थंय येवन मामलेदार हांचे कडेन वाद घालपाक सुरवात केली. उपरांत हें प्रकरण मारपेटा मेरेन पावलें. कॅब चालक अमिरसुहेल शकीलसाब सनदी (सुभाषनगर-बेळगांव) हाणें लवू मामलेदार हांकां मारपेट करपाक सुरवात केली. लॉज धनया सयत हेर कांय जाणांनी सनदीक आडावपाचो यत्न केलो, तरी लेगीत ताणें मारपेट चालूच दवरलो.
ह्या प्रकारा उपरांत स्वताक सावरून मामलेदार लॉजाची इस्काद चडून आपल्या रुमांत वचपाक गेले तेन्ना ते कोसळ्ळे. ते उपरांत लॉज वेवस्थापनान उपचारा खातीर तांकां तत्काळ हॉस्पिटलांत दाखल केले. पूण दोतोरांनी तांकां मरण आयिल्ल्याचें घोशीत केलें.
ह्या प्रकरणांत दुबावीत अमिरसुहेल सनदी हांचे आड खुनाचो गुन्यांव नोंद केलो आनी ताका अटक केली.
मजगतीं, पोस्टमार्टमा उपरांत मामलेदार हांची कूड शेनवारा गोंयांत हाडली आनी आयतारा सकालीं तांचे कुडीचेर निमाणे संस्कार केले.
मनभेद नाशिल्लेच : सुदिन ढवळीकार
लवी मामलेदार हे आपले बरे इश्ट आशिल्ले. राजकारणांत आपले तांचे कडेन मतभेद जाले, पूण आमच्यांत मनभेद नाशिल्ले. आपणे आपल्या एका बऱ्या इश्टाक व्हगडायलो, अशें मंत्री सुदिन ढवळीकार हांणी प्रतिक्रिया दितना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
