भांगरभूंय | प्रतिनिधी
हाॅस्पिटलांतल्यान पळून वचपाक फुडाऱ्यांनी केली मजत?
पुणें, खबरां संस्था : ड्रग्स तस्कर ललित पाटील हाका ससून हॉस्पिटलांतल्यान पळून वचपाक मजत करपी ताचे दोन इश्टीणींक पुलिसांनी नाशिकांत अटक केल्या. तांचीं नांवां प्रज्ञा कांबळे आनी अर्चना निकम अशीं आसात.
प्रज्ञा कडल्यान ललितान २५ लाख रुपया घेतिल्ले. प्रज्ञाक अटक जाल्ल्यान ताचे कडल्यान व्हडली म्हायती मेळपाची शक्यताय आसा. तो पळून श्रीलंकेक वचपाचो आशिल्लो. पूण, ताका मुंबय पुलिसांनी चेन्नय धरलो. पुलिसांच्या ताब्यांत आसतना तो पळून कसो गेलो, तो खंयच्या राज्यांनी ड्रग्स पुरवण करतालो, ताची चवकशी पुलिसांनी सुरू केल्या. पळून वचपाक ताका पुलिसांनी, हाॅस्पिटलाच्या कर्मचाऱ्यांनी मजत केल्या जाल्यार तांचेर कारवाय जातली, अशें विभागीय आयुक्त राव हांणी म्हणलां.
उपचारा खातीर ससून हॉस्पिटलांत दाखल जाल्लो ललित हॉस्पिटलांतल्यान मेफेड्रोन (ड्रग्स) विकता अशें 29 सप्टेंबराक उक्तें जाल्लें. ललिताचो वांगडी सुभाष मंडल आनी रौफ शेख हांकां पुलिसांनी अटक केली. तांचे कडल्यान 2 कोटी रुपयांचें मेफेड्रोन जप्त केल्लें. 2 ऑक्टोबराक ललित बंदोबस्ताक आशिल्ल्या पुलिसांक चुकोवन हॉस्पिटलाच्या उपचार कक्षांतल्यान पळून गेलो. ते उपरांत पुणे पुलिसांचे १० पंगड ताका सोदताले. ललित हो ३४ वर्सांचो स फूट उंच तरणाटो. हाॅस्पिटल्यान पळून वतकच तो देड किलोमिटर चलत गेलो आनी पुणे रेल्वे स्टेशना कडेन पावन गायब जालो, अशी म्हायती मेळ्ळ्या.
ललित हाणें मुंबय, पुणे, नाशिक हांगा आपलो भाव भूषण हाच्या आदारान मेफेड्रोन विकिल्लेले. ताणें मेफेड्रोन मलेशिया, थायलंड, दुबय हांगां विकपाक धाडिल्ली. मुंबय पुलिसांनी ललिताक अटक केल्या. ताची पुलीस बंदखण सोंपतकच पुणें बंडगार्डन स्टेशनांत नोंद जाल्ल्या प्रकरणांत ताका अटक करतले.
श्रीलंकेंत विस्तार?
ससून हॉस्पिटलांतल्यान पळून गेले उपरांत ललित चेन्नय सावन श्रीलंकेंत वचून आपलो धंदो थंयच्यान चलोवपाची तयारी करतालो. मुंबयच्या साकिनाका पुलीस स्टेशनांत नोंद जाल्ल्या प्रकरणांत ललिताक पुलिसांनी धरलो. ताणें चेन्नयच्या एका इश्टाच्या मोबायलाचेर संपर्क सादलो. ही म्हायती मेळ्ळे उपरांत सकिनाका पुलिसांनी चेन्नय ललिताक अटक केली.
2 ऑक्टोबराक ललित ससून हॉस्पिटलांतल्यान पळून गेलो. ससून सावन चेन्नय मेरेन तो कसो पावलो? ताका कोणे आलाशिरो दिलो हाची चवकशी पुलिस करतले.
अंधारे हांची मागणी
ललित पाटील हाका पळून वचपांत राजकी फुडाऱ्यांनी मजत केल्या. ललिता वांगडाच बांदकाम मंत्री दादा भुसे आनी मंत्री शंभूराज देसाय हांची आनी हाॅस्पिटलाच्या डिनाची नार्को टेस्ट करात, अशी मागणी ठाकरे गटाची फुडारी सुषमा अंधारे हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
