भांगरभूंय | प्रतिनिधी
30 सप्टेंबर मेरेन नोंदणी करची : अध्यक्ष
दिवचल: शिरगांवचे श्रीलयराई जात्रे खातीर सुमार 70- 80 हजार धोंडां मदल्या वीस हजार धोंडांनी नांव नोंदणी केल्या. जांकां नोंदणी करपाची आसा तांणी 30 सप्टेंबर मेरेन ती करची असो उलो देवस्थानाचे अध्यक्ष दीनानाथ गांवकार हांणी मारलो.
जात्रेंत जी घडणूक घडली ताचे उपरांत समितीन गर्देचेर नियंत्रण दवरप आनी हेर गजालींनी काळजी घेवपाक खुबशे बदल सरकाराच्या सहकार्यान करपाचें निश्चीत केलें. हेच फाटभूंयेर ही नोंदणी सक्तीची केल्ल्याचें गांवकार हांणी सांगलें. ते घडणुके उपरांत समितीन तशेंच सरकारानूय गरजेचे उपाय करपा विशीं कांय खर निर्णय घेतल्यात. जे सुवातेर घडणूक घडली थंय उपाय करतले. ते विशीं बांदकाम खात्यान कांय दिसां आदीं पळोवणी निश्चीत केल्ली. मात कांय जाणांक आजूनय हे विशीं नोटीस मेळूंक नाशिल्ल्यान ती मुखार धुकल्ल्या.
मुख्यमंत्र्यांचें पुराय सहकार्य
अध्यक्ष दीनानाथ गांवकार हांणी सांगलें, देवस्थानाक मुख्यमंत्री प्रमोद सावंत हांचें पुराय सहकार्य मेळटा. गरजे वेळार तांची भेट घेवन म्हत्वाच्या गजालींची आमी फाटपुरवण करतात. कांय लोक गांवांत गरज नासतना राजकारण करतात. आमचो गांव शांत आनी सगल्यांक वांगडा घेवन चलपी आशिल्ल्यान कोणेंच देवस्थानाच्या विशीं राजकारण करचे न्हय, असो उलो तांणी मारलो. जात्रे पयलीं ज्या मार्गदर्शक तत्त्वांची अंमलबजावणी करपाची गरज आसा ती करपाचे नदरेन समिती जतनाय घेतली. मुख्यमंत्र्यांच्या मार्गदर्शना खाला आमी जायते उपाय करपाचे आसात, अशें गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
