भांगरभूंय | प्रतिनिधी
भांगरभूंय । पिनाक कल्लोळी
पणजीः आपूण आपले जिणेंत आपापल्या मळाचेर उत्कृश्ट आशिल्ल्या व्यक्तीं कडल्यान प्रेरणा घेत आयलां. तातूंत मायकल जॅक्सन, नुसरत फतेह अली खान वा लता मंगेशकार हांच्या सारक्या लोकांचो आस्पाव आसा. लता दीदी कडल्यान आपल्या उच्च दर्जाचें संगीत, कॉम्पोझिशन करपाची उर्बा मेळ्ळी, अशें ऑस्कर जैतवंत संगीतकार ए आर रहमान हांणी सांगलें. बुधवारा इफ्फींत लता मंगेशकार यादस्तीक व्याख्यानांत ते उलयताले. ह्या वेळार नमन रामचंद्रन हांणी तांची मुलाखत घेतली.
रेहमान हांणी सांगलें, लता मंगेशकार वा हेर नामनेच्या व्यक्तीं खातीर गीत कंपोज करतना वा संगीत दितना आपूण सदांच तांच्या काळांतल्या गितांची तुळा करतालों. आपलें गीत लता मंगेशकार आनी ह्रदयनाथ मंगेशकार वा लता मंगेशकार आनी मदन मोहन हांचे वरी बरे आसा काय कितें हाचो विचार आपूण करतालों. आदल्या काळांतल्या गितांनी आशिल्ली भावनिकता, गितांतलो अर्थ हांचे मेरेन आपूण पावपाक शकता काय कितें हाचोय आपूण विचार करीत आयलां. त्या व्यक्तींक तांच्या काळांत एक प्रमाण तयार करून दवरिल्लें.
आपणें तांच्या कामा पसून प्रेरणा घेतली, पूण तांची नक्कल करूंक ना. आपणे आपल्या गितांचो दर्जो अदीक बरो करपाचो यत्न केलो. एकदां एके संगीत कार्यावळींत आपूण आनी लता दीदी एकठांय काम करताले. कार्यावळीच्या आदल्या दिसा आमी रंगीत येसाय केली. राती न्हिदपाक आपल्या रुमाचेर वतना आपल्याक लता मंगेशकार हांचो आवाज आयलो. लागीं वचून पळयलें जाल्यार कळ्ळें, त अजून लेगीत गिताचो रियाज करताली. ह्या अणभवा उपरांत हांवें आपले भितर बदल केलो. कार्यावळी आदीं आपणें लेगीत रियाज करपाक सुरवात केली, अशें रेहमान हांणी सांगलें. लता दीदीक सगळ्यो गजाली बरे पद्दतीन जाल्ल्यो आवडटाल्यो. ते खातीर तांचे कडल्यान तुस्त तोखणाय जावप ही व्हड गजाल आशिल्ली. जिया जले ह्या गिता खातीर ती चेन्नय आयिल्ली. त्या वेळार आपूण तिका पयले खेपे मेळ्ळो. तांणी म्हजी कामाची आपलेपणान चवकशी केली. 2014 त लेगीत आमी एका आल्बमा खातीर परतून मेळ्ळे. मात तांची भलायकी बरी नाशिल्ल्यान तें गीत रेकॉर्ड करपाक जालें ना. तांचे कडल्यान आपल्याक कला मळा विशीं आशिल्लें समर्पण, कश्ट, त्याग ह्यो गजाली कळ्ळ्यो, अशें ए. आर. रेहमान हांणी सांगलें.
‘संद मेळ्ळ्यार गोंयच्या संगिता खातीर काम करतलों’
आपल्याक हे आदीं गोंयच्या परंपरीक संगिता खातीर काम करपाची संद मेळिल्ली. मात कांय कारणांक लागून तो प्रकल्प फुडें वचपाक शकलो ना. हे खातीर अशी संद मेळ्ळ्यार गोंयच्या संगिता खातीर निश्चीत काम करतलो, अशें ए. आर. रेहमान हांणी सांगलें.
आपल्याक ए. आर. रेहमान म्हणुनूच पाचारात
कार्यावळींत एका प्रेक्षकान ए. आर. रेहमान हांकां तांचे आदलें नांव दिलीप हें नांव घेवन प्रस्न विचारलो. त्या वेळार रेहमान हांणी आपल्याक दिलीप करूं नाकात, ए. आर. रेहमान असोच पाचारात, अशें स्पश्टपणान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
