भांगरभूंय | प्रतिनिधी
गौतम वेर्लेंकार आनी राहुल प्रभुदेसाय हांच्या फुडारपणाखाला लडाखांतल्या मावण्ड कांग यात्से 1 आनी 2चेर घोंयची पयली दोट्टी शिखर मोहीम हालींच येसस्वी जाली.
23 आनी 27 ऑगस्टाक 100 वरां (पांच दीस) 6200 मिटरा परस अदीक उंचायेची दोन शिखरां चडपी प्रभुदेसाय गोंयचो पयलो नागरीक थारलो. गोवा अल्पायीन क्लबान गरजेचो तेंको दिलो आनी ‘बुट्स अॅण्ड क्रॅम्पन्स’च्या वांगड्या सयत मोहिमेक उर्बा दिलीं. जांणी नायमलींग हांगा 5,100 मिटराचेर तळ उबारलो.
लेह ते नायमलींग असो पांच दिसांचो ट्रेक केल्या उपरांत पथकान उपकरणांचे तपासणी खातीर दोन दीस विसव घेतलो. ते उपरांत ह्या पथकान 22 ऑगस्टाचे रातीं कडेन कांग यात्से 2चें शिखर गांठपाचो यत्न केलो आनी 23 ऑगस्टाक सकाळीं 7. 43 वरांचेर णव वरांच्या खर यत्नां उपरांत शिखर गांठलें.
वट्ट 48 वरां उपरांत परतून सज्ज जावन पथकान 25 ऑगस्टाक 5700 परस अदीक मिटर उंचाय आशिल्ल्या कठड्याचेर कॅम्प उबारलो आनी थंडींत रात काडली.
26 ऑगस्टाक वेर्लेंकारान हाय अल्टिट्यूड पल्मोनरी लक्षणां (एचएपीई) जाली आनी तांणी सुरक्षीत थळाचेर वचपाचो निर्णय घेतलो. जाल्यार प्रभुदेसायान सपोर्ट स्टाफ आनी टिमींतल्या हेर वांगड्यां सयत प्रवास चालूच दवरलो.
26 ऑगस्टाक सांज वेळार कांय वरां विसव घेतल्या उपरांत पथकान कांग यात्से 1चेर चडपाक परतून सुरवात केली. 27 वेर सकाळीं 9.01 वरांचेर प्रभुदेसाय आनी ताच्या पथकान शिखर गांठलें.
गोंयच्या गिर्यारोहकां खातीर अंदूंचें वर्स येसस्वी थारलां. पंकज नार्वेंकार हो मावण्ट अॅव्हरेस्टाचेर चडपी गोंयचो पयलो गिर्यारोहक थारिल्लो. ते उपरांत करिश्मा वेर्लेंकार हिणें मावण्ट मेरा खातीर एकटेन मार्गदर्शीत चडाय केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
