लडाखांतले चरपाचे जागे चीनाच्या ताब्यांत,
भांगरभूंय | प्रतिनिधी
प्रधानमंत्री म्हणटात एकूय इंच जमीन चीनान घेवंक ना : राहुल
नवी दिल्ली, खबरां संस्था : चीनान लडाखांत एक इंच लेगीत जमीन ताब्यांत घेवंक नाशिल्ल्याचें प्रधानमंत्री नरेंद्र मोदी हांचें वक्तव्य असत्य आशिल्ल्याचो दावो काँग्रेस फुडारी राहूल गांधी हांणी केलो.
लडाखाची गोरवां चरपाची जमीन चीनी सैन्यान ताब्यांत घेतिल्ल्यान लडाखांतले लोक चिंतेस्त आशिल्ल्याचें लडाख भेटीर आशिल्ल्या राहुल गांधी हांणी सांगलें. आदले प्रधानमंत्री, राजीव गांधी हांचे जयंती निमतान तांकां आर्गां ओंपले उपरांत ते पत्रकारां कडेन उलयताले. चीनी सैन्यान हांगाच्यो चरपाच्यो जमनी ताब्यांत घेतल्यात. आतां आमी थंय वचूंक शकनात अशे लोक सांगतात. देखून चीनान एक इंच लेगीत जमीन ताब्यांत घेवंक ना हो प्रधानमंत्री नरेंद्र मोदी हांचो दावो फट थारता.
‘भारत जोडो’ यात्रे मजगतीं लडाखाक भेट दिवपाचें मनांत आशिल्लें. पूण कांय कारणांक लागून तेन्ना लडाखाक येवप जावंक ना. ताका लागून लडाखाचो व्हडलो दौरो करचो, अशें दिसलें. हांगाच्या लोकांचें कितें म्हणणें आसा आनी तांच्यो समस्या, हुस्के समजून घेवप होच उद्देश आसा अशें गांधीन म्हणलां.
लडाखांत भारतीय आनी चीनी सैन्य तीन वर्सां परस चड काळ जालो तैनात आसा. जो मेरेन शिमेच्या वाठारांत शांतिकाय पातळना तो मेरेन चीना वांगडा संबंद सामान्य जावपाक शकनात, अशें भारतान सेगीत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
